Кугыжанышнан кум символжо кокла гыч иктыжлан – тистылан – элыштына посна кече, 22 август, пӧлеклалтын. Тудын кум тӱсыжат символичный улыт: ошо тыныс илышым, арулыкым, канде ӱшаным да чытышым, йошкарге вийым да куатым ончыктат. А чылан пырля калыкнан поян историйжым да икоян улмыжым пеҥгыдемдат. Тӱҥ символна мемнам ожно илыше кугезына-влак, нунын подвигышт, сеҥымашышт дене кылда да шкенан элна, калыкна верч кугешнымашым шочыкта.
Теҥгече чыла вере тудым тӱрлӧ семын чапландареныт. Россий кугыжаныш флагын кечыже дене республикыште илыше калыкым элнан президентше, регион вуйлатышынат саламленыт. Юрий Зайцевын ик ойжым ушештаренак кодыман: «Таче элнан куштылго огыл пагытышыже – Кугыжаныш флагын кечыжын посна значенийже. Тудо ме садак сеҥена манын, калыкнан чоткыдо кӧргӧ чон вийжылан ӱшаным пуа».
Россий флагын кечыжлан пӧлеклалтше торжественный мероприятий кечывалым В.И.Ленин лӱмеш площадьште эртен. Мутат уке, тушто эн ончыч Российысе тистым торжественно нӧлталыныт. Мероприятий годым флагше чыла вере лойгалтын. Регион вуйлатыше лӱм дене Марий Эл правительстве председательын икымше алмаштышыже Евгений Кузьмин саламлен.
Вара самырык-влакын забегышт эртен. Тыглай огыл. Ӱдыр-рвезе-влак Российысе триколор тӱсан футболкым чиен, рӱдӧ площадь гыч Патриарший площадьысе кече шагат марте куржыныт. Пеш моторын нуно койыныт.
Пайрем программым ты кечылан лӱмын Йошкар-Оласе тӱвыра да каныме паркын, Сеҥымашын ХХХ идалыкшылан да Ленин лӱмеш тӱвыра полат пашаеҥышт ямдыленыт. Программышт утларакшым патриот шӱлышан лийыныт.
Моло тӱвыра учреждений-шамычат ты кечылан пӧлеклалтше мероприятийлам районлаштат эртареныт. Мутлан, С.Г.Чавайн лӱмеш книгагудышто «Кугыжаныш символ-влакын залыштышт» «Шочмо кундем герб ден флаглаште» экскурсий лийын. Икымше пачашысе холышто «У регион-влакын калыкышт» фотончер ыштен. Проектын авторжо РФ Общественный палатын еҥже Максим Григорьев Донецк, Луганск калык республикла да Запорожский ден Херсонский областьлаште илыше-влак дене палдара.
С.Носова
М.Скобелевын фотожо.
