НОВОСТИ ПАТЫРЛЫК Чолгалык

Россий армийын ӱшанле офицерже

Шарнат, огыт мондо
Россий армийын ӱшанле офицерже
10 декабрьыште Волжский район Сотнур кыдалаш школышто Украиныште спецоперацийыште геройла колышо офицер Максим Микутовлан мемориал оҥам почыныт.
Максим 1994 ий 14 июньышто шочын. 2011 ийыште Сотнур кыдалаш школышто кадет классым тунем лектын, Рязаньысе высший военно-воздушный командный училищыш пурен. Тушеч направлений почеш Уссурийск олаш колтеныт. Икмыняр гана Сирийыште лийын. 2022 ий март гыч Максим Евгеньевич спецоперацийыште участвоватлен. Чаманен каласыман, парашютно-десантный батальонысо ик рото командирын алмаштышыже, землякна, 27 ияш офицер, ӱмыр лугыч лийын.
Спецоперацийыште шке воинский долгшым лӱдде шуктымыжлан, патырлыкым ончыктымыжлан колымыж деч вара Максим Микутовым Мужество орден дене наградитленыт.
Мемориал оҥам почмаште Максимын ачаж ден аваже, родо-тукымжо, тунемше, туныктышо, юнармеец-шамыч, верысе калык лийыныт. Самырык воиным шарналташ Марий Элын пӱртӱс поянлык ресурс, экологий да йырым-йырысе средам аралыме министрже А.Киселев, Волжский район администраций вуйлатыше Т.Ильина, Волжский район вуйлатыше В.Сергеев, Волжск да Волжский районын военный комиссарже А.Николаев, верысе администраций вуйлатыше да молат толыныт. Ача-аваже Евгений Васильевич ден Анна Вячеславовналан чаманымашым каласеныт.
Шукышт Максимын пеҥгыде койыш-шоктышан, ушан-шотан, но тыгодымак моткоч проста, весела улмыжым палемденыт.
– Максим сай айдеме, эрге, йӧратыше ача ыле. Тудо шке пашажым йӧратен. Мыланем эргым нерген эртыше жап дене ойлаш моткоч йӧсӧ. Максим шуко «шокшо» верлаште лийын, но ты гана икмыняр арня гыч тыгай шучко уверым колынна, – шарналтен аваже Анна Вячеславовна.
Мемориал оҥам почмо, поро мутым шарналтыме годым шукыштын чурийышт мучко шинчавӱд йоген.
Тыге Волжский районын эше ик школыштыжо шарнымаш оҥам почмо тунемше-влаклан урок семын лиеш. Тудо мемнан ончыкылык волгыдо илышна верч вуйым пыштыше-влакым шарныкташ, пӱтынь калыкын ойгыж нерген шарныкташ тӱҥалеш. Герой-влак огыт мондалт, ӱмырешлан шарнымашеш кодыт.
В.Иванова.
Сотнур кыдалаш школын туныктышыжо.
Авторын фотожо.

Опубликовать в Одноклассники

Добавить комментарий