Родо да лишыл еҥ-влак коклаште
Тений июльышто республикыштына кум еҥ 100 ийым темен.
18 июльышто иканаште кок еҥым саламлыме. Юбиляр-влак Мария Никифоровна Волокитина ден Ольга Васильевна Шестоперова пашан ветеранже, Кугу Отечественный сарын ветеранже, тылын труженикше улыт, илышыштышт шуко ужыныт.
М.Волокитина Липецкий областьыште шуко йочан кресаньык ешыште шочын. Ачаже самырыкак ӱмыр лугыч лийын, да икшыве-шамыч пеш изи тудын деч посна кодыныт. Мария Никифоровна эн кугу шочшо лийын. Авашт куд йочам шкетын ончен куштен, йол ӱмбак шогалтен.
Еш Кугу Отечественный сар ийлаште пеш нелын илен. Мария Никифоровна заводышто кугыеҥ дене тӧр пашам ыштен, аважлан кертмыж семын полшен.
Сар деч вара ӱдыр Кишинев олаш куснен, торгово-кулинарный школыш пурен да тудым отличий дене тунем пытарен. Тиде олаште ончыкылык пелашыже – фронтовик Михаил Петрович Волокитин – дене палыме лийын. Самырык-влак 1947 ийыште мужыраҥыныт. Ешыште ныл йоча шочын.
Мария Никифоровна пушеҥгым обрабатыватлыме предприятийыште поварлан ыштен.
1973 ийыште Волокитинмыт Марий кундемыш, Волжск олашке, илаш кусненыт. Тыште Мария Никифоровна ден Михаил Петрович «Заря» ОАО-што пашам ыштеныт да тышечынак сулен налме канышыш лектыныт.
Кызыт Мария Никифоровнам шым уныкаж ден уныкаштын 11 шочшышт куандарат.
М.Волокитинам курымаш лӱмгечыж дене Волжск олаште калыкым социально обслуживатлыме комплексный рӱдерын директоржо Людмила Самошина саламлаш миен. Тудо ветеранлан Россий Федераций президент Владимир Путинын да Марий Элым вуйлатыше Юрий Зайцевын саламлымашыштым кучыктен, пеҥгыде тазалыкым да вуй ӱмбалне тынысле канде кавам тыланен.
Вес юбиляр, Ольга Васильевна, Карлыган интернат-пӧртыштӧ ила. Тудо Юмочкинск ялсоветыш пурышо Степановка ялыште шочын. Кресаньык ешыште ныл ӱдыр да ик эрге йоча кушкыныт.
Школ деч вара О.Шестоперова Елабуга оласе библиотечный техникумыш пурен. Тудым тунем пытарымек, Хлебниково школышто библиотекым вуйлаташ тӱҥалын. Специалист йоча-влакын кумылыштым налын моштен, южгунамже уроклаште туныктышо-шамычымат алмаштен. Тӱрлӧ темылан пӧлеклалтше сылнымут кас-влакым, шкенжын кружокшым, моло мероприятийым оҥайын да шарнаш кодшын эртарен, комсомол райкомын йыжыҥъеҥже лийын. Тудым йоча-влак дене пырля шуэн огыл колхоз пашашке колтеныт. Коллегыж ден тунемшыже-шамыч тӱткӧ да поро кумылан Ольга Васильевнам шокшын шарналтат да унала толын каят.
Лӱмгече озам Марий Турек муниципал район администраций ден Калыкым социально обслуживатлыме комплексный рӱдерын пашаеҥже-влак, Карлыган ял шотан илем администрацийын вуйлатышыже Борис Иванов, интернат-пӧртын директоржо Евгений Кандаков, Хлебниково школын туныктышыжо, тыгак ончычсо коллегыже-шамыч саламленыт. Пайрем ӱстелтӧрыштӧ чайым йӱын шинчыме годым Ольга Васильевна самырык жапшым кумылын шарналтен, тунамсе муро-влакым мурен да мыскараж дене воштылтарен.
О.Шестоперовамат В.Путинын, Ю.Зайцевын да Марий Турек район администрацийын вуйлатышыже Сергей Решетовын лӱмышт дене шокшын саламленыт, шуко поро тыланымаш ден мутым ойленыт.
22 июльышто пашан ветеранже, Кугу Отечественный сарын ветеранже да тылын труженикше Полина Степановна Торопова (снимкыште) курымаш лӱмгечыжым палемден.
Лӱмгече оза Ульяновск областьыште шочын. Кочаже доктор лийын, шуко черым эмлен, да тудын деке эсогыл тора кундемла гыч толыныт. Ачаже эҥер пароходствышто механиклан пашам ыштен, «Джон Рид» пароходышто коштын. Аваже суртоза лийын.
1931 ийыште 7 ияш Полина Карсун районысо Кадышево школыш каен, икымше класс гычак тыршен тунемын, мер пашамат кумылын шуктен. 1936 ийыште еш Волжск олаш илаш куснен. Тысе школ деч вара ӱдыр мединститутыш пурен, но аважын нелын черланымыжлан да тудым ончаш кӱлмылан кӧра тудым тунем пытарен кертын огыл.
1949 ийыште Николай Федорович Тороповлан марлан лектын. Тудыжо сар деч вара Кугыжаныш лӱдыкшыдымылык комитетыште служитлен. Ешыште кум йоча шочын.
Полина Степановна Зеленодольск олаште санитарный врачын полышкалышыжлан, тыгак «Орлёнок» ДОУ-што, Санэпидемстанцийыште, «Марбумкомбинат» ОАО-што, «Яльчик» санаторийыште ыштен, Волжск оласе йочасад-влакын цеховой комитетыштым вуйлатен. 1994 ийыште 70 ийым темымекыже, сулен налме канышыш лектын.
Вачӱмбакыже тичмаш курымым пыштен гынат, илалше ӱдырамаш тачат чолга илыш-йӱлам куча: эрдене эр кынелеш, йӱштӧ вӱд дене чывылалтеш, зарядкым ышта, яндар южышто коштеш. Полина Торопова илышым йӧратымыже да моткочак поро улмыж дене кумылым налеш. А руш классик-шамычын почеламутыштым могай сылнын лудеш! Тыгак шуко мом шарнымыже да чыла тидым оҥайын каласкалымыж дене ойыртемалтеш.
Полина Степановнам родо-тукымжо ден лишыл еҥже-влак веле огыл, пошкудыж ден палымыже-шамычат моткоч йӧратат, а куд уныкаж ден уныкаже-шамычын кандаш шочшышт нерген гын ойлыманат огыл – коваштлан чыла ышташ ямде улыт.
Юбилярым курымаш лӱмгечыж дене Волжск ола округын вуйлатышыже, верысе депутат-влак погынымашын председательже Татьяна Бынина ден Волжск оласе калыкым социально обслуживатлыме комплексный рӱдерын пашаеҥже-шамыч шокшын саламленыт, пеҥгыде тазалыкым, чон ласкалыкым, лишыл еҥ-влакын тӱткышышт ден йӧратымашыштым тыланен, Россий Федераций президент Владимир Путинын да Марий Элым вуйлатыше Юрий Зайцевын саламлымашыштым, пӧлекым да сылне пеледыш аршашым кучыктеныт.
Меат юбиляр-влакым саламлена да пеҥгыде тазалыкым тыланена.
М.ИВАНОВА
Марий Элын Паша да социальный аралымаш министерствыжын фотожо
