Марий Элым вуйлатышын пашажым жаплан шуктышо Юрий Зайцев Волжск оласе 4-ше №-ан школым аклен.
Тений тыште аутизман йоча-шамычлан ресурс класс ден #ДЕТИКАКДЕТИ шинчымаш процессын участникше-шамычлан полшымо рӱдер пашам ышташ тӱҥалыт. Тыгак ментальный инвалидностян 18 ияш деч кугурак ийготан еҥ-влаклан республикыштына жапым пайдалын эртарыме икымше рӱдерым почаш паледыме.
Ю.Зайцев тиде школыштак почмо инвалид йочан ача-ава-шамычын «Ончыкылыкан икшыве» организацийыштышт лийын.
Тыште ынде вич ий кече еда кастене инклюзивный мастерской ден усталык студий-влак пашам ыштат. Тушко ментальный инвалидностян йоча ден подростко-шамыч коштыт. Наставникышт «Пиалан билет» отрядын волонтёржо-влак улыт.
Республикым вуйлатышын пашажым жаплан шуктышо мастерской-влакын помещенийыштым ончен, школ директор Марина Янковская, организацийын вуйлатышыже Александра Алексеева да йоча-шамыч дене мутланен, вуйлатыше ден педагог-влаклан чолга илыш корным кучымыштлан, кӱлешан пашам шуктымыштлан тауштен.
«Те молодец улыда. Тендан гай энтузиаст-влаклан уло шӱм-чонем дене куанем. Тендан тыршымыда дене начар тазалыкан йоча-шамыч илышлан келыштаралтыт, улан тунемыт, йолташ-влакым муыт», – манын Ю.Зайцев.
2023 ийыште школышто «Образованийын школ системыжым модернизироватлымаш» федеральный проектын кышкарыштыже олмыктымо пашам умбакыже шуяш, туныкташ да воспитатлаш кӱлшӧ средствам налаш палемдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
