Йошкар-Олаште Марий Элын 2036 ий марте социально-экономический вияҥмаш стратегийже проект-влакым каҥашыме да нуным илышыш пуртымо шотышто сессий лийын.
Регион вуйлатыше Юрий Зайцев Марий Элнан тӱҥ стратегический документым каҥашымым республикын 10 ий жапыште вияҥме корныжын тӱҥалтышыж семын палемден.
– Россий Федерацийын президентше Владимир Владимирович Путинын майысе указыштыже палемдыме национальный цель ден задаче-влакым шотыш налын, мыланна мом эн ончыч ыштышаш паша направлений-влакым палемдыман. Стратегийым илышыш шыҥдарымаш экономикын чыла гаяк сферыжым у кӱкшытыш нӧлталшаш, еҥ-влакын илышыштым саемдышаш, – каласен республик вуйлатыше.
Юрий Зайцевын кӱштымыж почеш стратегийым ямдылыме паша 2024 ий декабрьыште тӱҥалын. Тылеч вара тышке исполнительный кучем ден верысе самоуправлений орган, бизнес, научный организацийла гыч еҥ-влак ушненыт. Тыгак дискуссий, посна да тӱшка вашлиймаш-влак лийыныт, республикыште илыше-шамыч деч йодыштмашым эртареныт. Тыге регионым вияҥдыме 6 тӱҥ направленийым палемденыт: тиде – демографий да еш политике, образований да науко, самырык-влакын политикышт, приборостроений, фармацевтике да малотоннажный химий, туризм. Стратегийым илышыш пуртымо дене 2036 ий марте внутренний региональный сату 1,7 пачаш, инвестиций 2 пачаш, бюджетын шке ыштен налме доходшо 1,6 пачаш кушшо манын регион тыршаш тӱҥалеш манын палемдат.
Юрий Зайцевын ойлымыж почеш, 15 сентябрь марте проектын мер каҥашымашыже-влак эртат. А идалык мучаш марте стратегийым пеҥгыдемдышаш да илышыш пурташ тӱҥалшаш улыт.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен.
