Кажне ийын Марий кугыжаныш университетыште художественный самодеятельностьым йӧратыше-влаклан «Рвезылык йӱк» фестиваль лиеш. Эртышым шергалаш гын, тудыжо вузышто 1965 ий гычак эртаралтеш, да икымше курсыш тунемаш толшо-шамычлан студент илышыш ошкылым чолган ышташ йӧным пуа.
Тунемме верын историйыштыже икымше гана фестивальыш Марий Элым вуйлатыше Юрий Зайцев миен. Тудо историй-филологий факультетын икымше курсыштыжо тунемше-влакын конкурс программыштым ончен. «Мутем уке – сай выступлений да программе. Ӱжмыланда тау. Молан мый таче тыште улам, умылтарем: соцкылысе лаштыкышкем «Тендам мемнан мероприятийыш ӱжына» возеныт. Комментарийым лудым, а тушто тыге серыме: «Тудо огеш тол, садак ок луд». Мый принцип почеш тольым да тидлан нимынярат ом ӧкынӧ», – студент-влак дене вашлиймаш годым каласен тудо да чылаштымат шушаш пайрем дене саламлен: тений Марий кугыжаныш университетлан – 50 ий.
«Рвезылык йӱк-2022» 7 ноябрьыште тӱҥалын. Кок арняште вузын 13 факультетше ден институтшо программыштым ончыктат, а 1 декабрьыште Йошкар-Олаште верланыше Сеҥымашын XXX идалыкше лумеш тӱвыра полатыште гала-концерт лиеш, тушто сеҥыше-влакым саламлаш тӱҥалыт.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен
Д.Речкинын фотожо
