Йошкар-Олаште Воин чап мемориал воктене 8 майыште «Шарныме вер. Сеҥымаш тул» патриотический акций лийын.
Марий Эл вуйлатыше Юрий Зайцев Курымашлык тул деч ылыжтыме лампым пожар ваштареш кучедалме службын пашаеҥже-влаклан ончыкыжым республикысе районлашке наҥгаяш пуэн.
– 1975 ийыште 50 ий ончыч 9 Майыште Йошкар-Олаште Ленинградысе Пискарёв мемориалын факелже деч курымашлык тулым чӱктеныт. Меат шарныме, мемнан калыкым чапландарыме, сеҥымаш да лӱддымылык символ семын тиде тулым умбакыже колтена, – каласен Юрий Зайцев.
Акций Россий МЧС-ын Марий Элысе тӱҥ управленийжын темлымыж почеш эртаралтын. Тулым МЧС-ын посна машинаже-влак дене районлашке пожарно-утарыше частьлаште наҥгаеныт. А Сеҥымаш кечын муниципалитетлаште чӱктеныт.
Мероприятийыште «Йошкар-Ола Газпром газораспределений» ООО управляющий организацийын — «Йошкар-Ола Газпром межрегионгаз » ООО-н генеральный директоржо Михаил Владимиров лийын.
– Республикысе 5 мемориалыште Курымашлык тул чарныде йӱла, а 12 мемориал сооруженийыште жапын-жапын чӱкталтеш, – палемден компаний вуйлатыше.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен.
