Марий Эл вуйлатыше Юрий Зайцев «Йошкар-Ола» округ мучко паша дене кудалышт савырнен, инфраструктур да социальный проект-влак кузе шукталтмым терген.
Тудо Семёновка селаште шуко пачеран пӧрт чоҥалтмым ончен, тыште тулык да ача-ава деч посна кушшо йоча-влаклан пачерым пуат. Сравочым 100 еҥ налеш. Илыме вер 2024 ий мучаште ямде лийшаш. Чоҥымо паша график почеш шукталтеш, кызыт нылымше пачашым нӧлтат.
Объект-влакым тергышыжла, Юрий Зайцев Олимпийский резерв училищын модульный спортзалжым аклен. Тыште мини-футболлан капкам шогалтат, мобильный баскетбол фермым (пырдыжысе кӱртньӧ ората – Л.С) пижыктат, шведский стенкым да моло тренажерым вераҥдат, кумдыкым тӱзатат, тыштат спорт дене заниматлаш чыла шотыштат йӧнан площадкым ыштат. Лишыл жапыште училищын тунемме корпус зданийжым да тӱшкагудым уэмдаш тӱҥалыт.
Республик вуйлатыше тыгак Тыныслык уремыште автомобиль кудалыштме корнын Киров урем деч тӱҥалын ола чек марте участкыжым олмыктымо паша кузе кайымым терген. Подрядный организаций тыште вӱд йоген пурышо канализацийым пужен ыштен, 3,3 километр кужытышто корно шартышым тӧремден, кызыт ӱмбал лончыжым шарат. Олмыктымо паша «Лӱдыкшыдымӧ сай качестван корно» нацпроект дене келшышын ышталтеш.
Юрий Зайцев умбакыжым «Дружба» стадионышто верланыше Гимнастике рӱдерыште лийын. Стадионын шуко функциян спорт комплексшым 2024 ий февральыште Гимнастике рӱдерыш савырыме, тидлан республикысе бюджет гыч 36,3 миллион теҥгем ойырымо. Тылеч посна «Россий спорт гимнастике федераций» общероссийский общественный организаций 18 миллион утла теҥгеаш окса полышым пуэн. Таче ты рӱдерыште гимнастике дене спорт школ верланен, 243 еҥ тунемеш да заниматла.
«Рӱдер Россий кӱкшытан объект семынак, эсогыл вес олала да регионла гыч тышке тренироватлалташ толыт. Паша эше шуко. Эн тӱҥжӧ – йоча-влак таза кушкышт, чыла велымат шуаралтышт. Мыйын тыгай сай шижмаш, такшым, ола вуйлатышат, правительстват, ме чын корно дене ончыкыла каена», – палемден регион вуйлатыше.
Ончен коштмо деч вара Юрий Зайцев совещанийым эртарен, тушто Йошкар-Олан социально-экономике велым вияҥмыж йодышым каҥашеныт.
Марий Эл Республикым вуйлатышын пресс-службыжын уверже негызеш
Л.СЕМЕНОВА ямдылен
Д.РЕЧКИНЫН фотожо
