30 август гыч 1 сентябрь марте рӱдолаштына «И краткая» Йошкар-Оласе икымше кинофестиваль эртаралте. Тушто пӱтынь элнан 11 регионжо гыч кӱчык метражан эн сай 25 фильмым: 10 игровой, 7 документальный да 8 анимационный пашам – жюрилан аклаш темленыт ыле. Тунам нуным фестивальын кокымшо кечынже Йошкар-Оласе «Октябрь» кинотеатрыште кумылан еҥ-влаклан 10 шагат эр гыч 22 шагат кас марте яра ончыктеныт.
А ынде нине фильмым уэш рӱдолаштына, адакшым республикысе районлаште илыше-влакат яра ончен кертыт. Мутлан, Йошкар-Олаште С.Г.Чавайн лӱмеш калыкле книгагудышто 9, 13, 15, 19 октябрьыште ончаш йӧн пуалтеш. Тыгак нуным Советский, Шернур, Параньга, У Торъял, Килемар, Морко, Звенигово да Волжский районлаште ончыктат.
Любовь Камалетдинова