Марий Эл Курск областьыште ВСУ-н атакыжлан кӧра азапыш логалше-влаклан кӱлешан чыла полышым пуаш ямде.
«Курск областьыште илыше-шамычлан гуманитар полышым погымо да лӱдыкшӧ кундем гыч куснен толшо-влакым мемнан дене жаплан вераҥдыме пункт-шамычым пеш писын почынна. Кӱштымем почеш, правительстве председательын икымше алмаштышыже Михаил Зиновьевич Васютин грузым оптен колтымо пашам эскерен. Волонтёр ден азапыш логалше-шамыч верч тургыжланыше чонан еҥ-влак кӱлешан арверым, вургем ден йолчиемым, школьник-шамычлан канцеляр сатум погеныт. Чыла тидым кӱчык жапыште намиен пуэна. Азапыш логалше-влаклан полшаш кумылан чыла еҥлан тауштем. Курск, Марий Эл пеленет!» – возен Телеграм мессенджерысе лаштыкыштыже Марий Элым вуйлатыше Юрий Зайцев.
Таче кечылан гуманитар полышым погымо кум пунктым почмо:
— Мер полыш штабыште (Йошкар-Ола, Пушкин урем, 14-ше пӧрт);
— В.И.Ленин лӱмеш тӱвыра полатыште (Йошкар-Ола, Машиностроитель урем, 22-шо А пӧрт);
— Россий Армийын тӱвыра полатыштыже (Йошкар-Ола, Сталинград кредалмашын геройжо-влак урем, 35-ше пӧрт).
Грузым погымо шотышто лекше йодышым +7 (8362) 63-00-39 телефон дене рашемдаш лиеш.
Курск область гыч Марий Элыш куснен толшо-влакым жаплан вераҥдыме ныл пунктым ямдылыме. Нунын кокла гыч иктыже – Корта ялысе «Виктория» олимпийский резерв спорт школ. Эртыше кечылаште тушко Марий Эл правительстве председательын икымше алмаштышыже М.Васютин илаш келыштарыме йӧным аклаш миен.
«Мемнан простажак огыл жапыште республикыштына азапыш логалше-влаклан полшаш ямде еҥ-шамыч эше шукын улыт. Республикнан рӱдолаштыже да районлаштыже илыше калык Курск областьлан гуманитар полышым погымо пункт-шамычым почмо икымше кече гычак поро кумылжым ончыкта.
Кундемышкына куснен толшо-влакым кечыште кум гана пукшаш палемденна. Кызыт нунылан эн ончычак личный гигиенылан средстве, вургем ден йолчием, школьник-шамычлан канцеляр сату кӱлыт. Чыла тидым шке ситарен кертына, а теве Курск областьыште кодшо-шамычлан гуманитар полышым лишыл жапыште колтена. Еҥ ойгым умылен моштышо да неле жапыште полшаш ямде улшо чыла еҥлан тауштем. Пырля ме чыла сеҥена», – палемден М.Васютин.
М.ИВАНОВА
Мер полыш штабын фотожо
