7 августышто Йошкар-Олаште С.Г.Чавайн лӱмеш национальный бибилотекыштат у книга дене палдарыме вашлиймаш эртыш. Тудо ончычсо тележурналист Любовь Пальминовалан (Борисовалан) пӧлеклалтын ыле.
Чот чаманен каласаш логалеш, Любовь Семёновнан илыш гыч кайымыжлан толшаш шыжым ик идалыкат шуэш. Но айдеме тунар ила, кунар тудым ош тӱняште илыше-влак шарнат. А ме – лишыл палымыже, йолташыже-влак, родо-тукымжо – Любам эре шарнена.
Любам лӱмжӧ дене гына ойлаш мыламат келшен толеш, вет тудын дене Марий кугыжаныш университетын марий филологий пӧлкаштыже вич ий пырля тунемын улына, студент ешыште шуаралтынна. 1975 ий августышто тунемаш пураш экзаменым кучымо кечыла гычак тиде ӱдыр шарнымашеш кодо: изирак капан, изиш комдыкрак неран, арава чуриянрак, шыргыжалын кутырышо. Мемнан группына икоян, келшен илыше ыле. Ты шотышто Любан койыш-шоктышыжат лачеш толын, тудо икоян улмо кумылым эшеат пеҥгыдемдаш манын, эре мом-гынат шонен муаш, темлаш тыршен…
Чыла тиде шарналте теҥгече тудын «Пӱрымашемлан илем тауштен» – «С благодарностью судьбе» книгаж дене палдарыме годым. Тышке Любовь Пальминова-Борисован возен кодымо почеламутшо-влакым марла-рушла чумырымо. Тиде кӱлешан, суапле сомылым шке ӱмбакше Ижевскыште илыше, Удмурт Республикысе Туныктыш институтышто тыршыше, педагогике науко кандидат, Любовь Семёновнан пеш сай палымыже Наталья Култашева налын. Тудак рушлаш кусарышым муын, тиде – Удмуртийын калык поэтше Сергей Матвеев. Сергей шкеже одо, но рушлаш чаплын кусара. Интернетыштат шуэн огыл одо поэт-влакын тудын рушлаҥдыме почеламутыштым лудаш лиеш. Любовь Пальминова-Борисован сылнымут саскажымат сайын кусарен, почеламут-влак чоныш пернышын йоҥгалтыт. Тыгак книгашке автор нерген икмыняр еҥын шарнымашыжым пуртымо.
Вӱдшӧ йога – серже кодеш, айдеме кая – мурыжо кодеш. Тидым эше ик гана ӱшандара Любовь Пальминова-Борисован чон шомакшым чумырыман книга.
Геннадий Сабанцев
Фотом С.Г.Чавайн лӱмеш калыкле книгагудын воткыл лаштыкше гыч налме.
