2 август – ВДВ-н кечыже
«Порысым кӱлеш семын шуктыза»
– Манеш Волжский район Чодыраялеш шочын-кушшо Сергей Михайлов. Жапше годым Чоткар кундемын эргыже срочный службым 2014-2015 ийлаште Омскышто эртен. Кум тылзе моло семынак учебкыште. Туштак парашют дене тӧрштылашыже логалын.
– Икымше гана тӧрштымем пешыжак ом шарне, а кокымшо гана лӱдмашан ыле, вет кузежым-можым палет, шижат. Чылаже шым гана тӧрштенам. Кум гана Ан-2, ныл гана ИЛ-76 самолёт гыч. Кокымшыж дене оҥайрак, кӱшкырак кӱзыкта да шукырак еҥ тӧршта. Кугу Отечественный сарлан 70 ий темме лӱмеш Москваште Парадыште маршироватлаш кугу куан ыле. «За 70-летие Победы» медаль дене палемденыт, – салтак илышыжым шарналтен мане Сергей Игоревич. – Идалык веле служитленам гынат, шуко мом ужын шукташ логале. Учёбкат, полевой выходат, лӱйкалымат, парашют дене тӧрштылмат чот келшеныт. 242-шо учебный центрыште кум тылзе лийме, механик-водитель должностьым налме деч вара парашютно-десантный полкыш колтеныт.
Армийыште лийме илышым вес семынрак ончалаш таратен, тӱняумылымашым вашталтен, йоча койыш деч кораҥаш полшен. Чылажымат вес семын шонен ыштет. Мӧҥгыштат ача-авалан полшаш кӱлмым сайын умылет, ешымат чумырышым. Сандене самырык-влаклан порысым кӱлеш семын шуктыза, армий деч ида лӱд манам.
2 августышто элыштына Юж десант кечым палемдат. Ты кечын тыгак элна верч вуйым пыштыше-влакым шарнена. Десантник-шамыч, кеч-могай сар годым эн ончылно, лӱдыкшӧ верлаште лийыныт, тӱҥ полышым пуэныт. Юж десант войскаште служитлыше-влакын тӱҥ ойыртемышт – парашют дене тӧрштылмышт, лӱддымылык, патырлык, писылык, канде берет, тельняшке.
Ончычсо семынак торжественный митинг теният Йошкар-Оласе рӱдӧ паркыште, Шарнымаш мемориал воктене эрта. чыла десантник-влакым шокшын саламлена, пеҥгыде тазалыкым, еш пиалым, тыныс кавам тыланена.
Е.Эшкинина.
