Уремыште леве, кӱшычын чевер кече шыратен онча, волгыдо канде кава кумылнам вӱчка. Кайык-шамычат мотор игечылан куанен, утларак да утларак чогыматат, сылне мурыштым мурат да шошо толмым шижтарат. Арамлан огыл лач ты сылне пагытыште, 8 мартыште, Ӱдырамаш-влакын тӱнямбал кечыштым пайремлат.
Йолташ-влак, ты кечым кузе да кушто палемдаш шонеда. Пайрем ӱстелыш кочкышым шке але пелашда пога? Ты кечын эн шерге пӧлеклан мом шотледа? Ала иктаж гана моткоч вучыдымо пӧлекым тыланда кучыктеныт?
Римма ПЕТРОВА, Марий Эл образованийын сулло пашаеҥже, Морко район Унчо кыдалаш школышто марий йылме ден литературым туныктышо:
– 8 Март – Ӱдырамаш-влакын тӱнямбал кечышт. Йоча годым ава-влакын пайремыштлан шотленам. Тунам пушеҥге укшым тодыл налына да, тӱрлӧ тӱсан кагаз дене тюльпан пеледышым ыштен, укшыш кередена ыле, вара авайланна пӧлекленна. Тидым эн сай пӧлеклан шотленна. Кугурак лиймеке, чыла ӱдырамаш-влакын пайремышт манын шонаш тӱҥалынам, чыланыштым (тунам саламлымаш открытке-влак ужалмаште лийыныт) саламлаш тыршенам. А кызыт уло еш дене пайремлаш йӧратем. Уна-влак толыт гын, эше чот куанем, утларакше уныка-влакым вучем. Шукыж годым пайрем ӱстелым ӱдырамашак пога, сандене мелнам, тӱрлӧ когыльым, перемечым кӱэштам.
Пӧлек шотышто каласаш гын, кычалтылше омыл. Кӧ мом пӧлекла, чылалан куанем. Авайлан пӧлеклыме гай пеледышым пуат гын, эше чот йывыртем дыр. Огыт мондо, шарнат, пагалат да саламлат манын шонем. Кызыт телефон дене шукын саламлат. Тидланат куанем, шкеат тыгай йӧн денак пайдаланем.
Пайремым утларакше мӧҥгыштӧ эртараш йӧратем. Молан манаш гын, паша кечын мӧҥгыштӧ пырля шагал лийына, а пайрем годым каналташат, мутым вашталташат, ыштен шуктыдымо сомылымат тӧрлаш лиеш.
Марий кундемысе чыла ӱдырамаш, ӱдыр-влакым сай пайрем дене саламлем. Тазалыкым, ласкалыкым, пиалым тыланем. Ешыште ваш-ваш умылен, йӧратен, пагален, икте-весылан эҥертен илыза. Тек вуй ӱмбалнына эреак тыныс кава лиеш.
Галина ЯКУШЕВА, мурызо:
– 8 Март – шошо кумылым, волгыдо шижмашым, пагалымашым пӧлеклыше пайрем. Кажне ийын ты кечын эргым, шешкым-влак, ӱдырем ден веҥым пӧлек дене толыт, а пелашем пеледыш аршаш дене куандара.
Пайремлан тамле чесым ӱстембаке кугу шешкым пога. Тиде кечынак эше мемнан уныканан шочмо кечыже. Садлан лишыл родо-тукымна дене кажне ийын пырля чумыргена.
Кучыктымо пӧлек кеч-могай шерге лиеш гынат, поро мут, чон гыч лекше шокшо тыланымаш да икте-весе дене келшен илыме деч шергыже нимоат уке! Моткоч вучыдымо пӧлек – тиде эрге уныка.
Йӧн дене пайдаланен, Антон уныкам шочмо кечыж дене шокшын саламлем.
Вера ГОРДЕЕВА, поэт:
– Ты гана 8 мартлан ме ава-ачам дене пырля погынена. Нунын шӧртньӧ сӱаныштым пайремлаш тӱҥалына.
Ӱстембаке пайрем чесым шукыж годым шкеак погем, вет тиде – ӱдырамашын сомылжо. Эн шерге пӧлек – йӧратыме еҥын тӱткышыжӧ. Пелашем пеледыш аршашым кучыктыде ок код, тидат моткоч куанле. Кажне пӧлекым вучыдымылан шотлаш лиеш. Тудо эреак кумылым нӧлта.
А.Байкова
Авторын фотожо
