5 декабрь Российыште доброволецын (волонтёрын) кечыже семын палемдалтеш. Тудым посна эртараш кӱлмӧ нерген указым Россий президент В.Путин 2017 ийыште луктын.
Марий Элыштат поро пашам шуктышо ятырын улыт. Волонтёр-влак медицине пашаеҥ-шамычлан полшат, тӱвыра, экологий мероприятийлаште чолгалыкым ончыктат. Спецопераций жапыштат доброволец-влак гуманитар полышым чумыраш да тудым боецна-влаклан намиен шукташ тыршат.
Йолташ-влак, волонтерын пашажым кӱлешанлан шотледа? А те поро пашаш чӱчкыдынак ушнеда?
Мария ГРИГОРЬЕВА, Марий тӱвыра рӱдерын методистше:
– Волонтёр толкын кызыт поснак вияҥеш. Кугыжаныш полшымо дене самырык-влак чолга, эре гаяк ямде улмыштым виян ончыктат. Волонтёр организаций-влакат республикыштына почылтыт. Мутлан илалше, илыме вер деч посна кодшо-шамычым пукшат. Эмганыше пийым, пырысым ончен эмлат…
Мыят студент годым волонтёр лийынам. Пӱтынь Российысе ялозанлык олимпиадыште, Озаҥысе универсиадыште пашам ыштенам, тыгак тӱвыра, шанче мероприятийлаште полшенам. Кызыт палымем-шамыч дене пырля салтак-влаклан чиемым погымо, окопысо сортам ыштыме. Журналист-волонтёр семын тений гуманитарный конвой дене Донецк, Луганск республиклаш, Белгородский, Запорожский областьлаш миен коштынам. Салтак-влакын тауштымо мутыштым колын, волонтёр пашан кӱлешлыкшым эшеат умылет.
Галина ПЕТУХОВА, республикысе Калык усталык да тӱвыра ден каныме паша шотышто шанче-методике рӱдерын методистше:
– Кӱлешлан шотлем, тиде пеш суапле да лектышан паша. Шке кумыл дене шуктымо паша кумылым нӧлта да эше ышташ тарата.
Самырык годым Тимуровец-влакын толкынышт дене тӱрлӧ сомылым шуктенна. Кугурак-влак 22 апрельыште илыме вер кумдыкыштым эрыкташ лектыт ыле. Кызытат тыгай поро пашаште уло кумылын ушнем. Тыгайыштым ынде волонтер але доброволец маныт.
Марина ПОЧТЕНЕВА, М.Шкетан лӱмеш Марий национальный драме театрын артистше:
– Волонтёр пашам кӱлешанлан шотлем. Тидлан мемнам йоча годымак туныктеныт. Тунам Тимуровец-влакын толкынышт маналтын. Школышто тунемме годым илалше-влаклан, ветеран-шамыч деке вӱдым нумалаш, пум шелаш да артанаш опташ полшенна, ял мучко макулатурым поген коштынна.
А кызыт волонтёр-влак тиде пашам шуктат. Палымем-влак коклаштат шукын улыт. Пытартыш ийлаште шукынжо спецоперацийыште улшо-влаклан полшат. Меат, театрын коллективше, поро пашашке ушнена. Шарнем икана Волжский районысо Мӱшыл ер кумдыкым эрыкташ миенна ыле. Какшан серыштат шӱкым кораҥденна, кажне ийын субботникыш лектына, театр йыр кумдыкым тӱзатена.
Спецоперацийыште улшо-влаклан шийвундо денат полшена, окопысо сортам ышташ калай банкымат погена. Поро пашам кажныже ыштышаш улына, порылык деч посна илаш ок лий.
Эльвира МОНАХОВА, Йошкар-Оласе военный комиссариатын пашаеҥже:
– Кеч-могай мероприятийым эртарыме годым полшышо-влак кӱлыт. Чылаж годым оксам тӱлен от сеҥе гын, волонтёр полыш – эн сай эҥертыш. Адакшым шкаланат волонтёр лияш оҥай. Тыге кеч-могай пайремыште организатор-влак деке лишылрак лият, палыме еҥ-влакым ужаш йӧн лектеш. А иктаж-могай кугу форум, соревнований годым чылажымат шке шинча дене ужат. Пӱртӱсым эрыктыше але больницыште полышкалыше, СВО-шко маскировочный сетьым пидше, вургемым ургышо волонтёр-влак пеш суапле пашам виктарат. А вет чылажланат жап, вий кӱлыт. Мыят илалше икмыняр еҥлан ятыр ий полышкалем: кочкыш сатум налам, суртым эрыктем, эмлымверыш коштыктем. Йошкар-Оласе пӱнчерым эрыктымашке лектам, сандене мыят волонтёр улам докан.
Алевтина БАЙКОВА ямдылен
Фотом еш альбом гыч налме
