Йоча республиканский клинический больницын поликлиникыштыже «Здравоохранений» национальный проектым илышыш пуртымо кышкарыште медицине организацийын у модельжым ыштыме. Тудо паллиативный черле-влаклан полышым пуаш тӱҥалме жапым палынак кӱчкемден.
Регионыштына первичный медико-санитарный полышым организоватлыме рӱдерын специалистше-влак тиде поликлиникыш миен коштмышт годым палдарыме да виктарыме системысе вашталтышым сай велым акленыт. Медорганизацийын кумдыкышкыжо пурымекак, пациент-шамычым мон кушто верланымыжым палдарыше стенд вашлиеш.
– Консультацийым пуымо поликлиникыште тыгак, у темлымаш-влакым шотыш налын, увертарыме системыш вашталтыш-шамычым пуртымо, – рашемда рӱдерын вуйлатышыже Ираида Ходырева. – Подразделенийын технический планыштыже увертараш кӱштымӧ чыла 26 элементым палемдыме. Тидыже пациент-влак ден нунын ача-аваштлан кӱлешан уверым регистратурышто рашемдыдеат муаш полша.
Рӱдерын специалистше-влак паллиативный черле-шамычлан медицине полышым пуымо шотышто проектым сайын мучашлыме нергенат мутланеныт. Поликлиникын медперсоналже республикысе районла дене верлашке лектын коштшо паллиативный бригадылан обслуживатлашыже паллиативный черле-влакым пеҥгыдемдыме пеш кугу пашам шуктен.
– Тыгай пациент-влакым обслуживатлаш налме жапым 1 тылзе гыч 7 кече марте кӱчыкемдыме, – палдара И.Ходырева. – Тидым проект паша кӱшеш ыштыме. Сай результат проект бригаде гыч ныл еҥын Киров медицине университетын Процесс-влак фабрикыштыже тунеммышт денат кылдалтын, шонем.
Ӱмаште Марий Элыште «Медико-санитарный полышым пуымо системым вияҥдымаш» регионысо проектым илышыш пуртымо кышкарыште медицине организацийын у модельжым 26 поликлиникыште шыҥдарыме. 2024 ийыште нунын деке эше кок медорганизаций ушна, тиде – Морко ден Параньга район-влакын кугыеҥ-шамычлан поликлиникышт.
М.ИВАНОВА
