Марий Элым вуйлатыше Юрий Зайцев тений июнь гыч Советский муниципальный район администраций вуйлатышын пашажым жаплан шуктышо Евгений Пушкин дене вашлийын.
Нуно кундемым социальный да экономике могырым вияҥдыме, тыгак ик эн кӱлешан проектлам илышыш пуртымо дене кылдалтше йодыш-влакым каҥашеныт.
«Районышто могай нелылык вашлиялтеш, республик кучем могырым могай полыш кӱлеш, палынем. Районыш паша дене мияш палемденам, тунам объектлам ончена, каҥашена да мом ышташ кӱлмым палемдена», – каласен Юрий Зайцев.
Советский районышто национальный проект-шамыч, федеральный да республик кӱкшытан программе-влак илышыш шыҥдаралтыт. «Сай качестван лӱдыкшыдымылык корно» национальный проект почеш чумыр налмаште 17,9 километр кужытышто корным шотыш кондат, тидлан 414,1 миллион теҥге кучылталтеш. «Илыме вер да оласе кумдык» национальный проект дене келшышын кудывече ден мер кумдыклам уэмдат. А «Пилотдымо авиаций системе» национальный проектлан кӧра Роҥго кыдалаш школышто тений Пилотдымо авиаций системе дене практический ямдылымаш рӱдерым почаш ямдылалтыт. Тидын деч посна кундемыште верысе тӱҥалтышлан полышым пуымо дене кылдалтше 11 проект (чумыр налмаште 13,6 миллион теҥгелан) почеш паша ышталтын.
Лишыл кок тылзыште республикын Транспорт да корно озанлык министерствыжын целевой субсидийже кӱшеш шуко пачеран пӧрт-влакын кудывечыштым да машина дене кудал пурымо корным шотыш кондаш палемдыме. Тиде пашалан 6 миллион теҥге кучылталтеш.
Тыгак Евгений Пушкинын мутшо почеш, 2024 ийыште районысо тӱвыра ден образовательный организацийлаште олмыктымо пашам ворандарен колташ палемдыме.
Марий Эл вуйлатышын пресс-службыжын уверже негызеш Г.Кожевникова ямдылен
