«Чылажат – сеҥымаш верч!» («Всё для победы!», pobeda.onf.ru) проектым илышыш пуртымо кышкарыште Марий Элысе калык Донецк ден Луганск калык республиклаште илыше, тыгак военный спецоперацийыште участвоватлыше-влаклан шӱм-чон вургыжын полша. Таче кечылан Калык фронтын региональный исполкомыштыжо кӱлешан шуко арвер ден погынен. Пресс-секретарь Ольга Кузьмина мыланем кок складымат почын ончыктыш.
Тыште мо гына уке! Мутлан, Йошкар-Олаште илыше Екатерина Михайлова ӱмбал вургемым конден. «Акций нерген колмекем, шуко шоныде, меръеҥ-влак деке йыҥгыртышым да чийыде кечыше у вургемым кузе пуаш лиймым рашемдышым. Вашке – шыже, а вара – теле… Нелылыкыш логалше калыклан курткем-влак моткочак кӱлеш лийыт, шонем. Нуно тыгай вургемым кунам эше налын кертыт – Юмо гына пала, а мыланем нимынярат жал огыл. Шкенан-шамычлан полшена вет!» – кумылжо тодылалтын мане поро шӱм-чонан пенсионер ӱдырамаш.
Юалге игечыште кӱлеш лийше арверым рӱдолаштына илыше эше ик пӧръеҥ конден, тыгодым лӱмжым каласен огыл. Аноним иктым гына палемден: шкежат шокшо точкылаште служитлен, сандене военнослужащий-влаклан тыгай шотан арверын эреак кӱлмыжым сайын пала. Тудо боец-шамычлан тепловентиляторым, коврик ден саҥгаш пижыктыме понар-влакым, мушкылтмо средствым конден. Эше ик пӧръеҥ прицелым, берцым, фляжкым ойырен.
Амалкалче-влакын сообществыштын йыжыҥъеҥже-влак кочкыш сатум: макароным, сакырложашым, сокым, минеральный вӱдым да моло продуктым – ынде кокымшо гана поген конденыт. «Дружина» ООО чоҥышо организацийын пашаеҥже-шамыч пунктыш чайым, шӱрашым, сакырым, тушенкым, кечшудо ӱйым, электророзеткым да мойн коробка да мешак дене пуртен коденыт, тыгак нацист-шамыч деч утарыме кумдыклаште инфраструктур ден социальный кыллам олмыктен нӧлтышӧ-влаклан чоҥызын вургемжым ойыреныт.
Республикысе моло организацият полшыде кодын огытыл. Мутлан, «Канцблок-Волжск» ООО Донбассыште илыше йоча-влаклан у тунемме ий вашеш канцеляр сатум ойырен, «Йола» агрохолдинг – тушёнкым…
«Поро кумыл акцийыш ушнаш ӱжмынам колшо да азапыш логалше шкенан калыклан полшышо-влаклан чылаштлан уло кумылын тауштена. Пырля ме кок тонн утла кочкыш сатум, тӱрлӧ вургемым, быт химийым, генераторым да утарыме кумдыклаште илышлан кӱлшӧ моло арверым погенна. Полышын ик ужашыжым Донбассыш лишыл кечылаште колтена, весыжым – август кыдалне», – палдарыш Марий Элысе Калык фронтын региональный исполкомжым вуйлатыше Надежда Ефремова.
Донецк ден Луганск калык республиклаште илыше, тыгак военный спецоперацийыште участвоватлыше да утарыме кумдыклаште инфраструктур ден социальный кыллам шотыш кондышо-влаклан гуманитарный полышым тыгай адрес дене намиен пуаш лиеш: Йошкар-Ола, Ленин проспект, 29-ше пӧрт (Марий Эл Республикын Профушемже-влакын объединенийышт велым пурыман), 4-ше пачаш, 50-ше кабинет. Оксам могай счётыш колтымо, вургем ден продуктым, арверым кушко намиен пуымо, Донбассыште илыше калыклан, тыгак боец-шамычлан лачшымак мо кӱлмӧ нерген «Чылажат – сеҥымаш верч!» проектын порталыштыже рашемдаш лиеш. Грузым адресат деке намиен шуктымо нерген отчётат – туштак.
Полшаш –
Полшаш – тугеже сеҥаш, йӧраташ , илаш, пиалан лияш. Тидым таче кажне шижын кертеш.
Маргарита ИВАНОВА
Авторын фотожо
