1 ноябрьыште В.Колумб лӱмеш республикысе йоча ден самырык-влаклан книгагудышто «Люблю тебя, мой край родной» («Мый йӧратем родной элемым») почеламутым лудмо республиканский конкурс эртаралтын. Тудо Марий Эл Республикын шочмо кечыжлан пӧлеклалтын. Чылаже 105 йоча мастарлыкшым терген, мут толмашеш таҥастарен каласаш гын, ӱмаште онлайн йӧн дене эртарыме ты конкурсыш 300 утла йоча шке пашажым колтен.
Почеламутым марла лудшо-влак тӱшкашке Йошкар-Оласе, Советский (Кукмарий, Кужмарий, Кельмаксола), Медведево (Шойбулак, Пекшиксола, Руэм, 3-шо да 4-ше номеран Медведево школла) районла гыч, 6-шо №-ан Морко, 1-ше №-ан Шернур школла гыч – чылаже 26 ӱдыр-рвезе ушнен. Жюриште улшо «Марий Эл» ГТРК-н тележурналистше Наталья Ямаева, «Ямде лий» газетын корреспондентше Христина Александрова дене иквереш каҥашымек, жюри председатель семын теве мом палемдем: йоча-влак конкурслан кӱлынак ямдылалтыныт, туныктышо-влакын полышышт чот шижалтеш; моло ийлаште утларакше тунемме программыш пуртымо почеламут-влакым ойырен налыныт гын, тений кызытсе ятыр авторын (А.Иванова, А.Щербакова, Н.Золотарев, А.Яковлева, Л.Иксанова, И.Делянова) лӱмжӧ йоҥгалтын; рвезе-влак шагалын, улыжат нылытын, лийыныт; участник-влак чылан манме гаяк мотор марий тувырым чиеныт, нунын ача-аваштлан таум каласыман; тений йоча-влакын лудмышт яндарын, марий йылмын йӱк ойыртемжылан келшышын йоҥгалтын; ончыкыжым Йошкар-Оласе школла гыч марла лудшо-влак шукырак ушнат манын ӱшаныме шуэш, а ты гана И.С.Палантай лӱмеш тӱвыра да сымыктыш колледжын Национальный сымыктыш гимназийже, 13-шо, 6-шо номеран школла да 14-ше номеран гимназий гыч веле лийыныт.
Икымше верым налше-влакын лӱмыштым ончыктена. 1–4 класс коклаште Татьяна Дубинина (Национальный сымыктыш гимназий), 5-9 класс коклаште Александр Цветников (6-шо №-ан Морко школ), кугурак класслаште тунемше да студент-влак коклаште Йошкар-Оласе сервиз технологий техникум гыч Ксения Григорьева.
Рушла лудшо-влак коклаште 79 ӱдыр-рвезе поэзий кумылжым рончен. Тиде тӱшкаште гын утларакшым Йошкар-Ола гыч лийыныт. Нунын мастарлыкыштым Россий писатель ушемын еҥже, поэт Геннадий Смирнов, Марий Элын сулло журналистше Владимир Мальцев да тележурналист, меръеҥ Алёна Иванова акленыт да сеҥыше-влакым палемденыт. Изирак ийготан-влак коклаште 1-ше вер дене 6-шо №-ан Морко школын тунемшыже Мария Цветникова (2 кл.), кокла ийготан-влак коклаште Йошкар-Оласе 14-ше номеран гимназий гыч Анна Патрушева (6 кл.), кугурак ийготан-шамыч коклаште Йошкар-Оласе 6-шо номеран школ гыч София Полякова (10 кл.) палемдалтыныт. Кажне йочан усталыкше тӱрлӧ кӱкшытан, южыжо тургыжланенат, а вет тӱҥжӧ – шочмо мландым, родной элым моктеныт!
Икымше верым налше Мария ден Александр Цветниковмытым мокталтыман, нуно изаж ден шӱжарже улыт. Рвезе туныктышыжо Л.В.Никифорован вуйлатыме «Звонкое слово» кружокыш коштеш, баян дене шокта, а Маша артист койышлан изинекак мастар.
Моло сеҥыше-влакын лӱмыштым В.Колумб лӱмеш республикысе йоча дене самырык-влаклан книгагудын сайтыштыже ончалза. Библиотекын краеведений пӧлкажын пашаеҥже-влак Надежда Никитина ден Оксана Джуманова конкурсым моткоч моштен, йоча кумылым ужын, тыматлын эртарымыштым палемден кодыде ок лий.
Л.СЕМЕНОВА
А.Яковлеван фотожо
