Марий тӱвыра рӱдер Тиште кече вашеш «О, мӱкш ава гай шочмо йылме» почеламутым сылнын лудмо онлайн-конкурсым увертарен. Чылаже 155 паша пурен.
Йоча-влакын мастарлыкыштым жюрин еҥже-влак: Марий Элын калык писательже Зоя Дудина, Марий Эл писатель ушем вуйлатыше Светлана Архипова да рӱдерын методистше Сергей Карпов – акленыт. 10 декабрьыште М.Шкетан театрын кугу сценыште выступатлымышт деч ончыч йоча-влакым Зоя Дудина саламлыш.
– Таче йоҥгалтарыме почеламутда ӱмыр мучко чоныштыда илыже, шӱм-чондам ырыктыже, кугу илышыш лукшо ӱжык мут семын йоҥгыжо. Пайрем семын шонен лудса. Тунам гына поэзий айдемылан илаш полшаш тӱҥалеш. Чоным почын лудын моштымыда мыйым моткоч куандарыш. Иктешлышыла, ончыкылык нергенат каласыде ом чыте. Иктаж лучко еҥ ик почеламутымак лудыт, ала-кудыжын эре иктымак лудмыла чучеш – ме вет чыла эскерена. Вес ийын мемнан пагалыме йӧратыме поэтна Валентин Колумбын лӱмгече идалыкше лиеш. Колумб лудмашлан кызытак ямдылалтса, почеламутым ойырыза. Моркышто вашлийына! – каласыш Зоя Михайловна.
Сеҥышыш 15 тунемше лектын, теве нунын лӱмышт:
1-4 класс коклаште: Артем Сергеев (Морко, Арын), Ева Шатова (Волжский, Памар), Анна Петухова (Медведево, Знаменский), Иван Широбоков (У Торъял, Тошто Торъял), Ульяна Царегородцева (Советский, Ӱшнур);
5-7 класс коклаште: Михаил Александров (Волжский, Памар), Максим Михайлов, Элина Сомина (И.С.Палантай лӱмеш тӱвыра да сымыктыш колледжын калыкле сымыктыш гимназийже), Антон Иванов (Морко, Унчо), Аделина Алдушкина (Курыкмарий, Усола);
8-11 класс коклаште: Ксения Дмитриева (1-ше номеран Морко школ), Станислав Михайлов (Морко, Унчо), Дарья Юрьева (Калыкле сымыктыш гимназий), Анастасия Мишакова (Курыкмарий, Пӹзӹкныр), Виолетта Трифонова (Советский, Кельмаксола).
– Тунемшем Антон Иванов ялнан уста поэтше Василий Мироновын почеламутшым лудын. Кочаже улмым пален, тудо эшеат кумылаҥын. Тыршымыже арам лийын огыл, сеҥышыш лектын. Вес тунемшем Станислав Михайлов икмыняр ий тӱрлӧ конкурслашке ушна, сандене мастарлыкымат поген, – мане Морко район Унчо школын марий йылмым да литературым туныктышыжо Людмила Игнатьева.
Ӱдыр-рвезе-влакын лӱмыштым лӱмынак ончыктышна, вет почеламутым лудмышт дене нуно марий йылмынам чапландарат. Сеҥымашыштлан ача-авашт тек куанат, а туныктышышт-влак кугешнат.
Лидия СЕМЕНОВА
Р.Николеван фотожо
