Юл кундем федерал округысо законодатель-влакын ассоциацийыштын заседанийыштышт пилотдымо авиацийым вияҥдыме да йӱлаш пурышо духовно-нравственный поянлыкым арален кодымо йодышлам онченыт.
Ассоциацийын 75-ше заседанийже Ульяновскышто эртен. Тушко Марий Эл гыч Кугыжаныш Погын председатель Михаил Васютин ден Молодёжный парламентын председательже, депутат Мария Дорогова миеныт.
Заседанийыште Россий президентын Юл кундем федерал округышто полномочный представительже Игорь Комаров ден Ульяновск областьын губернаторжо Алексей Русских участвоватленыт.
«Пилотдымо авиацийым вияҥден колтымо йодыш законодатель-влак велым тӱткышым йодеш. Профильный специалист-шамычым ямдылаш программе кӱлеш. Тыште кызыт пилотдымо техникым ямдылен лукташ производствым, нунылан кугыжаныш велым полшымо мере-шамычым ямдылыше, инфраструктурым вияҥдыше регион-влакын темлымашышт тӱҥ верым налшаш», – палемден Ассоциацийын координаторжо, Угарман областьысе Законодательный Погынын председательже Евгений Люлин.
Кокымшо йодыш дене Марий Эл Кугыжаныш Погынын председательже Михаил Васютин докладым ыштен. Марий парламентын спикерже верлаште пуртымо программе ден паша радам кышкарыште шуко еҥым авалтыше тӱвыра, шочмо элым йӧраташ ӱжмӧ, шинчымашым пуымо проект-влакым илышыш пуртымо йӧн-шамыч дене палдарен. Округышто граждан, калык да религий-влак кокласе келшымашлан поснак кугу тӱткышым ойырымо нерген ойлен. Михаил Зиновьевич самырык тукымым шочмо элым йӧратыме шӱлышеш куштымо, историй шарнымашым арален кодымо пашашке молодёжный парламентын чолган ушнымыжым палемден. Ешым пеҥгыдемдыме да тудлан полшымо сай практике семын Чувашийын «Вместе навсегда – высшая цель семейной жизни», Удмуртийын «Семейный код: про здоровье», Йошкар-Ола да Марий епархийын «Семья – малая церковь» проектыштым ончыктен. Тыгодымак икмыняр неле йодышым палемден, нуным пырляште рашемдаш да федерал, регионал кӱкшытлаште пеҥгыдемдаш темлен.
Ассоциаций эртарыме анализ да луктын каласыме шонымаш-влак негызеш ыштыме иктешлымаш почеш пунчалым луктын. Тушто Юл кундем федерал округышто ыштыме паша дене пайдаланыме шотышто темлымаш-шамычым ончыктымо.
* * *
Заседанийын кышкарыштыже округын самырык парламентарийже-влак кугурак коллегышт – регионласе закорганлам вуйлатыше-шамыч – дене пырля «Авиастар» авиастроительный заводыш миеныт. Тушто нуно заводын историйже да пашаж дене палыме лийыныт, авиастроенийлан кадрым ямдылыме йодышлам каҥашеныт.
Ассоциацийын координаторжо, Угарман областьысе Законодательный Погынын председательже Евгений Люлин вашлиймашым иктешлымыж годым палемден: «Самырык-влак предприятийыште пашам ышташ веле огыл, тудым кӧргӧ гычак вашталташ ямде улыт. Таче молодёжный советын томжылан шотлалтше еҥ-шамыч эрла промышленностьым у кӱкшытыш луктын кертше грамотный вуйлатыше лийын кертыт».
* * *
Ульяновскыштак Юл кундем федерал округысо субъект-шамычын закорганлашт пеленысе молодёжный парламент-влакын ассоциацийыштын 10-шо заседанийышт эртен. Тушто Михаил Васютин ден Мария Дороговат лийыныт.
Парламентарий-шамыч самырык-влак коклаште йӱлаш пурышо духовно-нравственный поянлыкым арален кодымо да пеҥгыдемдыме шотышто кугыжаныш политикым илышыш пуртымо, тыгак Кугу Отечественный сарыште сеҥымылан 80 ий теммылан пӧлеклалтше пайрем мероприятий-влакым пырля эртарыме йодышлам каҥашеныт.
Россий президентын Юл кундем федерал округышто полномочный представительжын алмаштышыже Олег Машковцевын палемдымыж почеш, самырык-влаклан тӱрлӧ кӱкшытан форумлаште шкем ончыкташ сай йӧн лиеш. Евгений Люлин Шочмо элым аралышын да Сеҥымашлан 80 ий теме идалыкыште пырля шуктымо пашаште икте-весе дене кутырен келшаш, тушко чылам ушаш кӱлмым палемден. Примерлан Угарман областьысе Молодёжный парламентын Кугу Отечественный сарын ветеранже-влакым тойымо чыла верым тӱзатыме шотышто тӱҥалтышыжым конден – тидын дене молодёжный организаций, волонтёр да черке пашаеҥ-влакат келшеныт.
Самырык парламентарий-влак ассоциацийын координаторжо Владимир Москаленком полномочийын у срокшылан угыч сайленыт.
Маргарита ИВАНОВА
Снимкыште: Юл кундем федерал округын самырык парламентарийже-влак.
Ульяновск областьысе Законодательный Погынымашын фотожо
