Лаштыкнан тачысе унаже – Оршанке район Пуял ялын ӱдыржӧ, МарГУ-н студенткыже Виктория МОЧАЛОВА.
Вика эстараде аланыш эше школышто тунеммыж годымак лектын, а шукерте огыл тудо самырык режиссёр Денис Шаблийын ямдылыме кӱчык метражан «Ирга» фильмыштыже тӱҥ рольым модын. Ты кином калыклан ончаш да аклаш августышто лукшаш улыт.
Ӱдыр мураш кунам кумылаҥын? Репертуарже кугу мо? Киношто войзалташ кӧ темлен? Нине да моло йодышлан вашмутым Виктория дене мутланымеке пален нална.
– Вика, мураш кунамрак шӱмаҥынат?
– Изиэм годсек мураш йӧратем. Йочасадыштат тӱрлӧ пайремым сӧрастараш логалын. Мурылан шӱман улмем Елена Сергеевна Рыбакова ден Римма Алексеевна Кудрявцева шижын шуктеныт. Нунын лӱмышт марий муро тӱняште шукылан палыме. Елена Сергеевнан келыштарыме семжылан моткоч шуко муро возалтын, тудын тыршымыжлан кӧра ятыр мурызо усталык корныш шогалын. Нунын кокла гыч иктыжлан шкемымат шотлем.
– Икымше гана кумда сценыш могай муро дене лектынат?
– «Маскаиге» муро дене Йошкар-Олаште эртаралтше «Яндар йӱк» конкурсыш ушненам да икыше верыш лектынам. Тиде сеҥымаш умбакыжат муро аланыште кушкаш да репертуарым пойдараш кумылаҥден. Садлан Кугунур школышто индеш классым тунемын лекмеке, Палантай лӱмеш тӱвыра да сымыктыш колледжын хор пӧлкашкыже пуренам. «Преподаватель», «хор коллективым вуйлатыше», «артист»» специальность-влакым налмеке, Марий кугыжаныш университетын калыкле тӱвыра да тӱвыра кокласе кыл институтыш тунемаш пуренам, кызыт кокымшо курсыш вонченам.
– Колледжыште тунеммет годым сценыш чӱчкыдынарк лекташ тӱҥалынат, очыни?
– Туге, вокал дене педагог Надежда Николаевна Захарован тыршымыжлан кӧра республикысе веле огыл, Россий кӱкшытан конкурслашкат чӱчкыдынак ушненам да лауреат лӱм дене палемдалтынам. Мутлан, Сочиште гран-прим, а Санкт-Петербургышто икымше да Гнесинмыт лӱмеш Российысе музык академийыште эртаралтше конкурсышто кокымшо верым налынам.
2019 ийыште икымше гана «Ший памаш» фестиваль-конкурсыш ушненам. Тушко Надежда Николаевнак ушнаш темлен да мыйым ямдылен. Усталык шӱлышан таҥасымаште ик эн самырык участник лийынам.
– Фестиваль-конкурс мо дене шарналт кодын?
– Тушко тӱрлӧ регион гыч мурызо-влак чумыргеныт, кажныже талантан улмыж дене ойыртемалтын. Чыланат икте-весе дене каҥашенна, тӱрлӧ йодышлан вашмутым пырля кычалынна, садлан шкан уым пален налаш, йолташ-влакым муаш йӧным ыштен да кушкаш полшен. Сымыктыш тӱняште чапланыше еҥ-влакын мастер-классыштат пеш пайдале лийын.
– Репертуарыштет мыняр муро уло? Нуно мо нерген улыт?
– «Авай», «Шинчаштемже – шинчат», «Мыланна», «Оҥгыр вуй», «Эн пиалан» … Чылаже коло утла погына. Тӱҥалтыште Елена Сергеевна ден Римма Алексеева дене пашам ыштенна, а вара нунак вес автор дене кылым кучаш темленыт. Виктория Мамаева, Христина Александрова икмыняр мурын мутшым возеныт. Кызыт у мурым ямдылем, лишыл жапыште калыклан колышташ луктам.
Мурем-влак йӧратымаш, пӱртӱс да моло нергенат улыт.
– А семым келыштараш кӧлан ӱшанет?
– Евгений Бахтинлан, Станислав Устюговлан, Александр Куприяновлан, Дмитрий Пекцоркинлан да молыланат.
– Марий Эл радиоштат нуно йоҥгалтыт? Мурет-влакым колыштмеке, чонетым могай шижмаш авалта?
– Йоҥгалтыт, икымше гана латик ий ончыч «Оҥгыр йӱк» мурым радиош пуэнам, туддеч вара – икте почеш весым. Муремым колыштам да кумылем нӧлталтеш, у пашалан вий-куат ешаралтмыла чучеш.
– Вика, тунемат, репертуарым пойдараш тыршет, тыгодымак эше туныктышылан пашам ыштымет нерген ойлышыч? Кузе шуктет?
– МарГУ-ш заочно тунемаш пурымеке, вик пашам ышташ тӱҥальым, Йошкар-Оласе 28-ше номеран лицейыште 5-8 класслаште тунемше-влаклан музык урокым вӱдем. Чылаже кумло классыште урокым эртарем. Жапше годым школышто, а вара колледжыште налме шинчымаш дене йоча-влакым палдараш да музык направлений дене эшеат шуко пален налаш шканемат пеш пайдале.
А мурым чон йодмо почеш ямдылаш тыршем.
– Колледжыште тунеммет годым Эшпай лӱмеш Марий кугыжаныш филармоний пеленысе «Эреҥер» ансамбльын участникше лийынат. Тушко пашам ышташ каяш кумыл лийын огыл?
– Ӱжыныт тушкат, ӱжыныт вес олалашкат… Но туныктымо пашам ойырен налмемлан нимынярат ом чамане.
– Виктория, ешыштет кӧн гай мураш кумылан улат, маныт?..
!!! Материалым тичмашнек «Марий Эл» (14.07.2023) газетыште лудаш темлена!
А.БАЙКОВА
Фотом еш альбомжо гыч налме
