Пиал… Мо тудо тугай. Пиалан лияш куштылго мо? Те шкендам пиаланлан шотледа?
Наталья БОГДАНОВА, мурызо:
– Пиал – тиде ош тӱняш толмаш, ош тӱняште чын илен моштымаш. Шкемым пиалан айдемылан шотлем: уло воктенем шергакан аваем, шочшем-влак, ешем; ӱстембалне кинде-шинчал, чоным куандарыше мотор пӱртӱс да муро алан. Пиалан лияш куштылгыжак огыл шонем, вет тидлан илышын тӱрлӧ йыжыҥжым чытен лекман да вара арален моштыман.
Анна ПЕТРОВА, Сиреники селасе тӱҥ общеобразовательный школ вуйлатышын туныктымо паша шотышто алмаштышыже (Чукотка АО, Провиденский ола округ):
– Кажне айдеме пиалым шке семынже умыла: кӧлан гын тудо – чапле пӧрт, автомашина, шийвундо… Изи йочалан гын пеленже аваже лийже. Теве кызыт выпускник-влак экзаменым кучат. Нунылан сай отметкылан экзаменым сдатлаш да тунемаш пураш – тиде пиал, а мыланем – йочамын куанже, ешемын, лишыл родо-тукымемын тазалыкышт. Мутлан, шукыштлан пиал – тыныс илыш. Тиде пуламырлан кӧра чонем пеш коршта. Сай, таза уш-акыл дене салтак-влак мӧҥгышт, ешышкыш пӧртылмыштымат пиаллан шотлем.
Пиалан улам. Йол ӱмбаке шогалтымыштлан, илыш-корнышто чын корным муын мошташ туныктымыштлан ача-авамлан, а илышыште ӱшанле эҥертыш улмыштлан лишыл родо-тукымемлан, ешемлан таум ыштем. Йырем поро кумылан йолташ-влак улыт, нунын дене мутланен, ик ойыш шуын пашам ышташ, иктаж кӱкшытыш шуаш… Тидат шкешотан пиал, шонем. Шке пиалан улат гын, йырваш улшо-влакланат пиалан лияш полшет гын, поро кумылан-влак шукемыт. Тидыже вара сай огыл мо?
Эльвира ПОПОВА-ГАМИЛЬТОН, мурызо, ютюб блогер, Марий Элын шочшыжо, 21 ий Флорида штатын Таллахассии олаштыже илыше:
– Кажне айдеме пиалым шке семынже умыла. Иктылан тиде – окса, весылан – чонлан келшыше паша, кумшылан – йӧратыме да йӧратыше лияш. Мыланем тазалык эн шерге: шкемын да пӱтынь ешын, родо-тукымын, йолташ-влакын. Тазалык уке гын, оксажат нимолан, пашат огеш куандаре, йӧраташ да йӧратыме лияшат йӧсӧ. Ешыште, йолташ-влак, калык ваш пагален, аклен, шотлен да йӧратен илымымат пиаллан шотлыман.
Шкемым пиаланлан шотлем. Мо илышыште кӱлеш, мо дене чонем куана, мо мыйым пиаланым ышта – илышыштем чыла уло. Тидланже Юмылан тауштем. Кажне айдемын пиалже – шке кидыштыже. Тудым ужын да аклен моштыман. Пӧлекым ышташ моткоч йӧратем. Тудым кучыктымо еҥын шыргыжалмыжат мыйым пиаланым ышта.
Ольга ФЕДОТОВА, Марий самырык театрын артистше:
– Пиал – илышыжын куанымашыже. Тудо чоншижмаш, куанымаш кумыл, эмоций дене кылдалтын. Йӧратыме пашан лектышыже лиеш, тиде пашат пиалвундо перкем конда – тиде кугу пиал. Пиал – воктен улшо йӧратыме да шерге еҥ, еш.
Мый пиалан улам: пеленем йӧратыме Серёжа пелашем, кум чечен ӱдырем… Мӧҥгысӧ ваш умылымаш, икте-весым пагалымаш да йӧратымашат айдемым пиаланым ышта! Ава – кече семын икте, тудо пиалан, йӧратыме да йӧратыше гын, тугеже икшыве-влакат пиал дене темше йӧратымаш саска семын кушкыт, пелаш мӧҥгӧ уло кумылын вашка…
А.БАЙКОВА
Фотом интернет гыч налме
