ПГТУ-што рекорд:
икымше курсышто кум тӱжем утла еҥ
Тенийысе у тунемме идалыклан Юл кундем кугыжаныш технологий университет рекордым ыштен – икымше курсыш кум тӱжем утла еҥ тунемаш пурен. Вузын 92 ияш корныштыжо тыгай ик ганат лийын огыл.
Шинчымаш кечылан пӧлеклалтше мероприятийыште университетын студентше ден преподавательже-влакым Марий Элым вуйлатыше Юрий Зайцев, сенатор, Федераций Советын председательжын алмаштышыже Константин Косачёв, Марий Эл Кугыжаныш Погынын председательже Анатолий Смирнов да ПГТУ-н ректоржо Игорь Петухов саламленыт.
Республикым вуйлатыше икымше курсышто тунемаш тӱҥалше-влакым саламлымыж годым палемден: нунылан Юл кундем федерал округын ик эн ончыл технологический вузыштыжо тунемаш йӧн пуалтын. Лач тыште шке жапыштыже кумдан палыме кугыжаныш мер деятель, кугу промышленный да чоҥышо предприятийлам вуйлатыше-влак шинчымашым погеныт.
Юрий Зайцев шке пашаштым тыршен ыштымыштлан преподаватель-влаклан таум каласен.
Марий Эл вуйлатышын пресс-службыжын уверже негызеш Г.Кожевникова ямдылен
