Пермь кундем Суксун оласе округыш пурышо Кызгынде ялыште Пеледыш пайрем гӱжлен.
Тений тудо Пермь край кӱкшытыштӧ эртыше «59 регионышто 59 фестиваль» проект кышкарыш шыҥдаралтын. Программе моткоч поян лийын, возат шке воткылыштышт Пермьыште да Пермь кундемыште илыше марий-влак: тиде – унам вашлиймаш, этномодым ончыктымаш, шуко саламлымаш, кугу концерт, тӱрлӧ ончер, кидпашалан туныктымо мастер-класс-влак. Марий калык кочкышым авызленыт, спорт ден йоча модыш-влакым эртареныт. Чыла вере келшымаш шӱлыш озаланен.
Тыгаяк шӱлыш Екатеринбургысо «Радуга парк»-ыште эртыше Пеледыш пайремыштат лийын. Марий кудо-влак шке омсаштым почыныт. А мастер- класслаштыже ӱштым куаш, шер дене сылнештарышым, тыгак аралтышым ышташ, тӱрлаш туныктеныт.
Снимкыште: Кызгындыште эртыше Пеледыш пайремыште уна-влакым марий ӱла почеш вашлийыныт. Фотом «Марийцы Пермьи и Пермьского края» воткыл лаштык гыч налме.
