Йошкар-Олаште Пеледыш пайрем 14-15 июньышто лиеш.
Марий Элын Тӱвыра, савыктыш да калык-влакын пашашт шотышто министерствыже тений пайремлан вуйын шогышым вашталтен. Ынде тудым республикысе Марий тӱвыра рӱдер огыл, Калык усталык рӱдер эртараш тӱҥалеш. 2022 ийыште кугыжаныш статусым налше национальный пайремна 2024 ийыште Российыште увертарыме Еш идалыклан пӧлеклалтеш да еш ден калык йӱлам, усталыкым арален да вияҥден толмашке виктаралтеш.
Тушко ушнаш шонышо республикысе да Российысе моло регионысо усталык коллектив, национальный рӱдер, кидмастар, музыкант, поэт, писатель, мер организаций-влак йодмашым 31 май марте cultur@mari-el.ru электрон адрес дене колтышаш улыт.
Программе:
14 июнь
Калык тӱвыра пӧрт
Деловой ужаш: Коми Республик ден Ленинград областьысе тӱвыра пашаеҥ-влак дене пырля «Тӱвыра да сымыктыш сферыште тӱвыра да каныме пашам организоватлымаш» семинар.
Патриарший площадь
18:00 – «Йыр куштымаш» калык куштымаш фестиваль.
15 июнь
9.00 – «Агавайрем» – марий кумалтыш (Тумер отысо Пӱнчер алан).
В.И. Ленин лӱмеш тӱвыра полат ончылысо кумдык
10.00 – Унам вашлиймаш.
11.00 – Тӱшкан ошкылмаш.
Ленин лӱмеш площадь
11.45 – Пеледыш пайремым торжественно почмаш.
19.00 – ЭтноКас (концерт/дискотеке).
Рӱдӧ каныме парк
10.00 – «Кудо – еш аралтыш» марий кудо фестиваль.
10.00 – «Мастар кид» ончер-ярмиҥга (Чавайн бульвар).
12.00 – «Пеледыш пайрем самырык сӱретче ден фотограф-влакын шинчашт дене» ЭтноПленер.
12.00 – «Модыш алан» йоча модыш площадке.
12.45 – Паркыш пурымаште унам вашлийме йӱла.
13.00 – «Черемис модмаш» этноспорт фестиваль.
13.00 – «Ик еш дене» калык усталык фестиваль (почмо эстраде).
15.00 – «Ешын вийже – кугезе йӱлаште» еш конкурс (почмо эстраде).
20.00 – кином ончыктымаш (почмо эстраде).
Чарла кремль
13.00 – Марий Эл этнобренд фестиваль.
14.00 – «Марий тӱрын сылнылыкше» национальный вургем фестиваль.
15.00 – «Пеледыш пайрем» концерт – республикысе Калык усталык рӱдерын творческий коллективше-влакын выступленийышт.
С.Носова
М.Скобелевын фотожо
