Июнь – пеледыш тылзе. Пеледыш – тӱнямбалне эн мотор кушкыл. Тудо шке моторлыкшо дене кумылым нӧлта да тамле пушыж дене чоным вӱчка. Арам огыл пеледышым икте-весе деке пагалымашым, йӧратымашым але тауштымашым ончыктымо годым кучыктена. Пеледыш пӱртӱсым, сурт кӧргым сылнештара да южым яндарым ышта.
Йолташ-влак, те могай пеледышым эн чот йӧратеда? Пӧлек шотеш тудым чӱчкыдынак кучыктеда?
Эльвира ПОПОВА, Марий Элын сулло артистше:
– Пионым, георгиным моткоч йӧратем. Пытартыш жапыште чыла тӱрлӧ пеледыш келша. Пӱртӱсын моторлыкшым ужын мошташ кызыт веле тунемаш тӱҥалынам. Пеледыш моторлыкым йыр шава, кумылым нӧлта да мландынам сылнештара.
Роза ПАРФИЛОВА, кидмастар:
– Роза пеледыш пеш келша. Пӧлек шотеш ош хризантемым налаш тыршем. Тудо моторлыкшо денат куандара, вӱдыштат кужун шога. Мыланем шукынжо розам кучыктат.
Эдуард ИМАНАЕВ, «Марий книга издательстве» савыктыш пӧрт вуйлатыше:
– Кажне пеледышын шке сӧраллыкше, сандене утыжым ом ойыркале. Но пӧлеклыме годым кӧ могайым утларак йӧрата, тугайым налын кучыкташ тыршем.
Ынде илыш тыгайыш савырнен: шочмо кече але моло пайрем годым пӧлек дене пырля пеледыш аршашымат «вучат», налаш перна чӱчкыдынак.
Вера КАБИРОВА, «Вестник района» газетын тӱҥ редакторжо (Советский район):
– Чыла пеледышым йӧратем, вет кажныже шке семынже мотор. Телым, мутлан, розалан куанем, шошым – тюльпанлан, а кеҥежым висвис ден кандывуй поснак келшат. Пеледышым кӧн да могай амал дене пӧлеклымыжымат шотыш налман. Тыглай кечын тудым кучыктымо – эн сай пӧлек! Мутат уке, пеледышым чӱчкыдынрак пӧлеклышт ыле манын вучена, вет тудо кумылым нӧлта, илаш вийым пуа да пагалымым але йӧратымым ончыкта. Теве шукерте огыл мыят олык пеледышым ик кугу аршашыш йывыртен чумырышым да йӧратыме авамлан пӧлеклышым.
Ирина ФОМИНЫХ, «МЭТР» ГАУК-ын директоржо:
– Тӱрлӧ пеледышым сайын келыштарен чумырымо аршаш келша. Тушто пасушто кушшат, «кукшо» пеледышат лийын кертыт, но аршашым чумырымаште тидым палыше еҥын мастар кидше шижалтшаш. Тыгайжым кӧлан пӧлеклышашым да амалым сайын палымеке веле ямдылаш лиеш. Аршашым сӧрастарымымат шотыш налман: икана мылам Пушкинын цитатыжым серыман кагазеш вӱдылалмым пӧлекленыт, а открыткыш молан тыге ыштымым рашемден возеныт, вет мый Шинчымаш кечын шочынам.
Пеледышым пӧлеклашат пеш йӧратем, шукыж годым чатката корзиҥгасе мотор композицийым ойыраш тыршем. Тыгайжым ятырже годым иктажшын шочмо кечыжлан налам. Шукерте огыл йога дене тренеремлан да ава лийшашлан пеледыш аршашым кучыктенам.
А.БАЙКОВА
Авторын фотожо