Кужэҥер районысо Шорсола ял кугу кумдыкым айла, урем-влак чак верланен огытыл, икте-весышт деч тораштырак улыт. Тушто писатель, руш классик А.П.Чехов лӱмеш урем уло. Мутат уке, тиде изиш ӧрыктара. Вес уремыштыже, У лӱманыштыже, шукерте огыл чоҥымо оралте-шамыч койыт. А Чехов уремыштыже утларакшым тошто сурт-влак шинчат, тыгак ожнысо клатым ужаш лиеш. Мо оҥайже, ялыште кудалтен кодымо оралте шинчалан ыш перне. Тидыже поснак куандара. ХХ курымышто чоҥымо пӧртла але пеҥгыде улыт. Теве ик тыгай суртын озаже-шамыч Лидия Ивановна ден Анатолий Михайлович Ивановмыт деке унала пурышна.
– Пелашем дене 1970-ше ийлаште ушненна. Тунам ончыкылык мариемын илыме верже лийын огыл. Анатолий мыйым еҥын суртышкыжо конден пуртен. Пӧртанурышто тошто пӧртым налын, Шорсолаште шынденна. Тудо вара шолдыргаш тӱҥалын, леведышыжат витен. Тыге 1980 ийыште у суртым нӧлташ пижынна. Кермычым, моло чоҥымо материалым наледенна. 1982 ийыште у пӧртыш илаш кусненна, – ойла озавате.
Ивановмытын пӧртышт эн ончычак мотор окнасергашт дене кумылым савыра. Тудым Лидия Ивановнан Пермь олаште илыше чӱчӱжӧ Владимир Пыркин ыштен. Владимир Степанович – тале кидмастар. Тудо Ивановмытлан окнасергам ыштыме деч посна суртын моло ужашыжымат сылнештараш полшен. Озавате чӱчӱж деке Пермьыш шке жапыштыже чӱчкыдын унала кудалыштын.
– Мый верысе «Маяк» совхозышто бухгалтералан пашам ыштенам. Пелашем тракторист лийын, вара тудо школышто, совхоз профкомышто, рабочкомышто тыршен. Вес профессийым налаш шонен, Пермьыште газ оборудованийым обслуживатлыше слесарь специальностьлан тунем лектын. Сулен налме канышыш лекмыж марте газослесарьлан ыштен, – умбакыже мутшым шуя ӱдырамаш.
Вара озавате дене сурт-оралтыштым, пакчам ончен лекна. Коеш, Ивановмыт пашаче улыт. Ийготым погышо улыт гынат, кызытат вольыкым, сурткайыкым ончат, пакчагӧргымат шындат.
Анатолий Михайлович ден Лидия Ивановна вич йочам, кок эргым да кум ӱдырым, ончен куштеныт.
– Эн ончыч Валентина ӱдырна шочын, вара – Наташа, Андрей, Светлана, Миша. Ме поян улына, латик уныкана, ик кугезе уныкана уло. Кажныжат мемнан куандара, чоннам вӱчка. Ныл шочшынаже ӧрдыжтӧ ила. Ик эргым – Йошкар-Олаште, кок ӱдырем, Света ден Наташа, ик жап Йӱдвел кундемыште иленыт. Варажым нунат Йошкар-Олаш кусненыт, пачерым налыныт. Кугурак ӱдыремже, Валентина, пенсийыш лектын гынат, Кужэҥерыште, лабораторийыште, пашам ышта. Михаил эргына пеленна ила. Шорсола школышто физкультурым туныкта. Тудын тыршымыж дене школышто таҥасымаш, ятыр спорт мероприятий эрта. Тунемшыже-шамыч сай результатым тӱрлӧ кӱкшытан соревнованийыште ончыктат, – кугешнен каласыш Л.Иванова.
Августышто Анатолий Михайлович ден Лидия Ивановнан пырля илымыштлан витле ий темеш. Пел курым пырля вычыл-вычыл илыше вате-марий эре ваш полшен, умылен, икте-весылан эҥертен илат. Ме нунылан пеҥгыде тазалыкым, кужу ӱмырым, ласка шоҥгылыкым тыланена.
М.СКОБЕЛЕВ,
Л.ШАБДАРОВА
М.Скобелевын фотожо