7 августышто, Куяр посёлкышто, Самырык-влакым военно-патриот шӱлышеш шуарыме «Авангард» рӱдерыште, Финн-угор калык-влак гыч лекше йоча-влакын тӱнямбал лагерьышт почылтын.
Слётын участникше-шамычлан Самырык тукымын политикыж шотышто комитетын председательже С.Игошин, Марий Элын тӱвыра, савыктыш да калык-влакын пашашт шотышто министрын алмаштышыже И.Садовин ятыр шокшо мутым каласеныт да лагерьым почмо дене саламленыт.
Тений лагерьыш Марий Эл, Карелий, Коми, Мордовий, Татарстан, Удмуртий, Башкортостан республикла, Угарман, Киров областьла гыч уста икшыве-влак чумыргеныт.
12 август марте йоча-шамыч шке моштымыштым тӱрлӧ мастер-классыште, конкурсышто, спорт таҥасымаште ончыктат. Творческий коллектив-влакат мастарлыкышт дене куандараш тӱҥалыт, фольклор кас-влак эртаралтыт. Тыгак лагерьыш погынышо-влак шке калыкын тукымвож йӱлаж нерген шукырак пален налыт. Поснак кугу тӱткышым йылмым да калык тӱвырам арален кодымо йодышлан ойырат.
Тиде слёт икте-весе дене кӱлешан шинчымаш дене пайлалташ вер веле огыл, тыгак, вес регионла гыч йолташым муын, пеҥгыде кылым ышташ сай йӧн.
Л.ШАБДАРОВА
Фотом «Эр вий»-«Юная сила» йоча да ийготыш шудымо-влакын организацийыштын соцкыл лаштыкышт гыч налме.
