1-4 августышто самырык-влакым сарзе да патриотизм шӱлышеш шуарен куштымо «Авангард» рӱдерыште «Акпатыр» сарзе-спорт многоборье дене округ кӱкшытан таҥасымаш эртен.
Мероприятийым торжественно почмо годым участник-влакым Марий Элым вуйлатышын лӱмжӧ дене регионын правительстве председательжын икымше алмаштышыже Евгений Кузьмин саламлен. Тиде таҥасымаш виян спортсмен-шамычым рашемдышашлан веле огыл, самырык тукымым патриотизм шӱлышеш кушташланат эртаралтеш, палемден тудо.
Таҥасымашке Юл кундем федеральный округын сарзе-патриот объединенийжын 14 командыже ушнен. Оренбург область, Татарстан да Марий Эл республикла, тыгак Запорожье гыч участник-шамыч тӱрлӧ чарак дене нелемдыме военизироватлыме полоса гоч эртен, пикш гыч лӱйылтын, товар ден булавым тура кышкылтын, канатым шупшын, калпакым поген налын таҥасеныт, спортын калыкле видлаштыжат вийыштым тергеныт. Мероприятийын кышкарыштыже тыгак тӱрлӧ экскурсий ден культур да каныме программе-влак лийыныт. Таҥасымаш-шамыч «Авангард» рӱдерыште веле огыл, У Торъял районысо Элембай ялыште верланыше Шукшан патыр заставыштат эртеныт.
Рушарнян кастене «Авангард» рӱдерыште сеҥыше-влакым палемденыт. Икымше верыш Морко районысо Коркатово лицейын спортсменже-шамыч лектыныт, кокымшыш – Оренбург область гыч команде, кумшо верым Волжский районысо Шарача школын командыже сеҥен налын.
Мероприятий Россий Федерацийын регионлаштыже молодёжный политикым вияҥдыме «Регион – самырык-влаклан» программын кышкарыштыже эртен. Тудо спортын военно-прикладной видше-влакым вияҥдымашке да чапландарымашке, марий калык талешке-шамыч дене палдарымашке виктаралтын.
Марий Элым вуйлатышын пресс-службыжын уверже негызеш М.ИВАНОВА ямдылен
