Икте – районышто, весе – округышто
Кугыжаныш Погын депутат-влакын арня мучко шуктымо пашашт дене палдарена.
Григорий Пейсахович Всероссийский науко-практике педагогике конференцийыште лийын.
Мероприятийыште самырык тукымым шочмо элым йӧратыме шӱлышеш куштымаште кызытсе йӧн да образовательный йырвелыште сай паша практике дене кылдалтше йодышлам лончыленыт.
Мария Дорогова «Единый Россий» партийын Мер полыш штабыштыже актёр Александр Обласов дене вашлиймашым организоватлен.
Мероприятийыш толшо молодёжь, боевой действийын ветеранже-шамыч да нунын ешышт актёр дене профессийыш толмо корныжо, усталыкым вияҥдыме йӧнжӧ да граждан ответственность нерген мутланеныт.
Юрий Игнатьев Морко районышто эртаралтше икмыняр мероприятийыште лийын.
Депутат «Рвезылык» ансамбльын коллектившым лӱмгече дене саламлен, тӱвыра пашаеҥ-влаклан марий калык йӱлам арален кодымашке кугу надырым пыштымыштлан тауштен, ялозанлык кооперацийым вияҥдыме йодыш дене семинарыште участвоватлен.
Ренат Магсумов Уфашке «Российын ӱдырамаш шӱмжӧ» фестивальын округысо йыжыҥышкыже миен.
Мероприятийыште Юл кундем федерал округын регионлаж гыч военнослужащий-влакын авашт ден пелашышт лийыныт.
Наталья Козлова «Единый Российын ӱдырамаш толкынжо» проектын кышкарыштыже муниципал депутат-влак да верысе шкевиктем орган-шамычын представительышт дене вашлиймашым эртарен.
Участник-влак кундемлаште пӱсын шогышо йодыш-шамычым решатлыме сай практике да тыгай шотан вашкылын ончыкылык паша радамже нерген мутланеныт.
Марина Янковская Волжскын «Оласе йӧнан йырвелым ыштымаш» программын кышкарыштыже йӱклаш темлыме кумдык-влакым палемдыме шотышто комиссийыштыже участвоватлен.
Спискыш йолешке-влаклан инфраструктурым да йӧнан общественный кумдыкым ыштымашке виктаралтше проект-шамычым пуртеныт.
Давид Погосян сайлыше-влаклан приёмым эртарен.
Калык кумдыкым тӱзаташ, тӱшка транспортым ешараш, спорт инфраструктурым шотыш кондаш да корнышто лӱдыкшым иземдаш кӱлмӧ йодыш дене миен. Депутат чыла темлымаш дене пашам ышташ тӱҥалын, тыгак оласе дзюдо залым йыжыҥын-йыжыҥын шотыш кондаш кутырен келшен.
Маргарита Иванова ямдылен.
Марий Эл Кугыжаныш Погынын пресс-службыжын фотожо.
