СПОРТ

Паралимпиадылан пӧлеклалтын

Паралимпиадылан пӧлеклалтын
Эртыше каныш кечылаштак «Корта» ече базыштак инвалид-влак коклаште республик кӱкшытан таҥасымаш лийын. Тудын тӱҥ шонымашыже – Китайыште паралимпийский олимпиаде почылтмылан да тушто Российын спортсменже-шамычын вийыштым тергаш тӱҥалмылан пӧлеклалтын улмаш.
Мероприятийым инвалид-влакын всероссийский ушемыштын регионал оргнизацийже ден Марий Элын молодёжный политике, спорт да туризм министерствын полшымышт дене эртаралтеш.
– Стартыш тӱрлӧ район гыч толшо чылаже витле утла спортсмен лектын. Ме тӱшкам шотыш налын таҥасенна. Ончыч ӱдырамаш ден пӧръеҥ-шамыч коклаште посна таҥасымаш ыле гын, варажым эстафетыште вийнам тергенна, – ойла Шернур район гыч толшо чолга пӧръеҥ Аркадий Макматов. – Мыланем чылажат пеш келшен. Финиш марте тольым. Мутат уке, ойыртемже ыле: тазалыкын тӱрлӧ чаракшылан кӧра кажныже шкенжым шке сеҥаш вий-куатым муын, а тидыже мыланна – эн тӱҥ. Организатор-влак ече трассымат пеш сайын ямдыленыт. Тау нунылан. Мый шке тӱшкаштем кумшо финишыш пурышым. Эстафетыште икымше верым Шернур, кокымшым Марий Турек, кумшо верым Кужэҥер инвалид-влакын организацийышт налыныт.
Аркадий Васильевич моткоч уста куштызо, тале спортсмен да кеч-могай жапыште полшаш кумылан тыглай поро айдеме. Жапше годым шкежат спорт дене пеҥгыде кылым кучен, школышто тунеммыж годым футбол дене модаш йӧратен, командын капитанжат лийын, ече дене талын куржталын, таҥасымаште ойыртемалтын да варажымат тиде ӱмыр мучкылан чонешыже кодын. «Армийыште футбол дене модмо годым йолем сусыртенам. Тудо ӱмыр мучкылан «кышам» коден. Футболист ден куштызо-влакын пулвуйышт коршта, нуно ты чер дене чӱчкыдын орланат. Мыйже кушташат йєратем, ече денат мунчалтыде ом чыте. Йолемже ончыч эркын корштен гын, варажым – чотрак. Окшаклен кошташ тӱҥалынам. Тыге операций мартеат шуынам, 2015 ийыште пел йолем «уэмденыт», – манеш таче кечылан поро кочай.
Аркадий Макматов Шернур районышто инвалид-влакын верысе мер организацийышт ик тале да чолга еҥже. Таче кечын ече дене инвалид-влак коклаште вийжым терга, чемпионат ик гана веле огыл лийын. А верысе командышт республик кӱкшытыштат ойыртемалтеш.
Е.Эшкинина.

Опубликовать в Одноклассники

Добавить комментарий