Йошкар-Олаште республикысе медицине тӧнежлам, ОМС-ын территориальный фондшым да страховой медицине организацийым вуйлатыше-влакын совещанийышт лийын.
Тушто Марий Эл правительстве вуйлатышын икымше алмаштышыже Наталья Ошланова погынышо-влакым тазалык аралтыш министрын должностьышкыжо шогалтыме Владимир Гладнев дене палдарен. Тыгак Республикысе психиатрический больницын тӱҥ врачше Тагир Бедертдиновлан «За заслуги перед отечественным здравоохранением» орденын медальжым, Марий Турек районысо рӱдӧ больницын тӱҥ врачше Флюра Фатыховалан оҥыш пижыктыме «Отличник здравоохранения» знакым, Йошкар-Оласе 2-шо №-ан поликлиникын район-влак кокласе эндокринологий рӱдержым вуйлатыше – врач-эндокринролог Елена Фроловалан да Республикысе клинический онкодиспансерын тӱҥ медсестраже Татьяна Хорошавиналан Россий Федераций Тазалык аралтыш министерствын Чапкагазшым кучыктен.
ОМС фондын директоржо Марина Гурьянова 2025 ийыште медицине полышлан обязательный медицине страхований почеш тӱлымылан тариф келшыкын ойыртемже нерген докладым ыштен. Тыгодым тудо инфекциян огыл хронический черан пациент-влаклан школын пашаж дене кылдалтше йодышым, профосмотр ден диспансеризацийым эртарыме качестве да онкопатологийым рашемдыше врач-шамычлан тӱлымӧ проблеме-шамычым тарватен.
Тазалык аралтыш министерствын правовой отделжым вуйлатыше Полина Саутенко Россий Федерацийын да Марий Элын законодательствылашкышт пуртымо вашталтыш-влак дене палдарен.
Республикыштына шукерте огыл пашам ышташ тӱҥалше литотрипторын – вергыште да шондыгалташте погынышо кӱм тыгыдемдыше аппаратын – йӧнжӧ-влак нерген Республикысе клинический больницын урологий отделенийжым вуйлатыше Василий Дубровин каласкален. Мут толмашеш, оборудованийын акше – 45 миллион теҥге, тиде оксам республикын бюджетше гыч ойырымо. Таче кечылан тыгай аппарат Юл кундем федерал округышто мемнан дене гына пашам ышта.
Маргарита ИВАНОВА
Марий Эл Тазалык аралтыш министерствын фотожо
