Йочам аралыме кечын Йошкар-Ола воктенысе «Радужный» йоча рӱдерыште у корпус-влакым почмо.
Ты кечын тушто Икымше-влакын толкыныштын «Российысе орлята-влакын содружествышт» проектышкышт чолган ушнышо йоча-влаклан смене почылтын, тыге ешартыш 98 вер ышталтын. Сменым торжественно почаш, ӱдыр-рвезе-влакын пайрем да кеҥеж каныш тӱҥалме дене саламлаш Марий Элым вуйлатыше Юрий Зайцев миен.
Рӱдерыште илаш тачысе жаплан келшыше кок корпусым «Россий Федерацийысе субъектлаште 2030 ий марте йоча-влаклан каныме да тазалыкым пеҥгыдемдыме организацийлам уэш чоҥымаш да вияҥдымаш» программе почеш ыштыме. Ты пашалан федерал да регионысо бюджетла гыч 110 утла миллион теҥгем ойырымо. Шушаш ийыште рӱдерыште кочмыверым да медицине пунктым олмыкташ палемдыме. Тиде программе Россий Федераций Советын председательже Валентина Матвиенкон да Просвещений министерствын тӱҥалтышышт почеш илышыш пурталтеш.
Марий Элым вуйлатыше Федераций Советлан, Россий Федераций правительствылан тауштен да каласен: «Образований системыште увертарыме Йоча каныш идалыкыште «Радужный» рӱдерыште кок у корпусым ыштымаш – мемнан республикысе йоча ден ача-ава-влаклан пӧлек». Тудо ешарен: палемдыме программе почеш ола деч ӧрдыжсӧ йоча каныме верлам уэмден вияҥдыме паша умбакыже шуйнаш тӱҥалеш. «Радужный» рӱдерыште корпус-влакым чоҥымо деч ончыч Володя Дубинин лӱмеш йоча рӱдерыште медпунктым капитально олмыктымо. 2026 ийыште «Пӱнчер» тунемме-тренировкым эртарыме базыште кок илыме корпусым ышташ да 2027 ийыште туштак медпункт ден пищеблокым капитально олмыкташ, а «Чодыра йомак» эмлыме-тазалыкым пеҥгыдемдыме комплексыште медпунктым уэмдаш палемдыме.
Марий Эл вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
