Энергетике
Пайрем вашеш сӧрастарыш
Тыгай сӧрастарышлажым, Йошкар-Ола администраций дене кутырен келшен, икымше гана ыштыме.
Кугу Отечественный сарыште сеҥымылан 80 ий темме вашеш светодиод иллюминаций сӧрастарышлам «Рӱдӧ да Юл кундем Россеть» ПАО-н «Мариэнерго» филиалже ямдылен да Йошкар-Ола мучко вераҥден.
В.И.Ленин лӱмеш площадьыште «Сеҥымашлан тау!» («Спасибо за Победу!») композицийым ыштыме. Дева Мария площадьыште, Марий паркыште, Ната Бабушкина скверыште, Лебедев ден К.Либкнехт да К.Маркс ден Строитель уремла ушнымо савыртышлаште вич лукан чолга шӱдыр гай светодиод иллюминаций аркылам келыштарыме. Ленин проспектыште пайрем тулсӧрастарыш-влак кум тӱсан россий флагым ушештарат.
«Мариэнерго» филиалын директоржо Сергей Хлусов палемден: «Кугу Сеҥымаш лӱмгече вашеш Марий Элнан рӱдолажым тул волгыдо дене сӧрастарымашке ушнымышт дене энергетик-влак Шочмо элнам аралыше да сӧй пасуэш вуйыштым пыштыше-влакым пагален шарнымыштым ончыктеныт».
Юрий ИСАКОВ.
Снимкылаште: пайрем вашеш сӧрастарыш-влак.
Фотом «Мариэнергон» пресс-службыж деч налме.
