Марий Элыште йоча-влаклан каныме да тазалыкым пеҥгыдемдыме кампаний тӱҥалын. Тений кундемыштына чылаже 202 тыгай организаций пашам ышта.
Тидын деч ончыч ола воктенысе каныме кумдыклаште олмыктымо, кӱлеш оборудованийлам налме да квалификациян специалист-влакым ойырымо. Тыгак лагерьлам Марий Эл Росгвардийын пашаеҥже-шамыч терген коштыныт. Нуно сигнализаций, видеоэскерымаш системе-шамычлан да йоча-влак дене пашам ыштыше-шамычын нунын дене пайдаланен моштымыштлан тӱткышым ойыреныт. Правам аралыше-влак тыгак каныме кумдыкышто улшо чыла объектым, печым, омсам, окнам да молымат тергеныт. Тидын деч посна пропуск режим, правам пудыртымо инструктажым эртареныт.
Йоча-влак жапышт пайдалын да оҥайын эртыже манын, тӱрлӧ направлениян программым ямдылыме. Нуно тӱҥ шотышто патриотизм шӱлышан, экологий, инженер-технический улыт. Смене жапыште походыш, экскурсий дене лекташ тӱҥалыт.
Кечывалымсе йоча лагерь-влакым торжественно почмаш 4 июньышто Йошкар-Оласе Рӱдӧ паркыште лийын. Ты кечын икшыве-шамычлан тӱрлӧ площадке пашам ыштен, тушто мероприятийлам «Азимут» йоча да самырык-влаклан рӱдерын, «Самырык техник-влакын станцийыштын» да Икымше-влакын толкыныштын еҥышт эртареныт.
Тидын деч посна «Лӱдыкшыдымӧ йоча жап» акций кышкарыште Марий Элыште Россий МЧС-ын Тӱҥ виктемжын да республикысе Кугыжаныш автоинспекцийын пашаеҥже-шамыч ийготыш шудымо-влаклан тематический площадкым ямдыленыт. Тушто ДПС-н патруль автомобильже да тудын оборудованийже дене палдареныт. Кумылан-влак инспекторат лийын онченыт. Вес площадкыште ӱдыр-рвезе-шамычым пожар расчёт дене палымым ыштеныт. Республикысе Кугыжаныш инспекцийын корно лӱдыкшыдымылык шотышто пӧлкажым вуйлатыше М.Булдакова йоча-влаклан корнышто, кудывечыште шкем кучымо правил-шамычым ушештарен.
Кечывалымсе йоча лагерь-влак оласе школла пелен веле огыл, тыгак ялласе общеобразовательный организацийлаште пашам ышташ тӱҥалыныт. Мутлан, Килемар районышто тушко тений 3-24 июньышто 7-14 ияш 287 ӱдыр-рвезе кошташ тӱҥалын. А 24-28 июньышто верысе бюджетын оксаже кӱшеш Икымше-влакын толкыныштын ик эн чолга 40 самырык еҥлан «Лидер» профилян лагерь лиеш.
Каныме да тазалыкым пеҥгыдемдыме лагерьыш эн ончычак контракт почеш службым эртыше военныйын, СВО-н участникше, начарын илыше-влакын ешышт да нелылыкыш логалше икшыве-шамычым налыт.
Г.Кожевникова
Фотом Марий Эл Образований да науко министерстве гыч налме
