2024 ийыште Марий Элыште 275 тулык йочалан илыме верым ойырымо.
Правительствын черетан заседанийыштыже 2024 ийыште посна категорий граждан-влаклан илыме верым ситарыме пашам иктешленыт.
Ӱмаште поснак кугу тӱткышым тулык йоча-шамычлан ойырымо. Республикын чоҥымаш, архитектур да илыме-коммунал озанлык министржын пашажым жаплан шуктышо Александр Горбуновын палдарымыж почеш, 2024 ийыште тиде тӱшкаш пурышо 275 гражданлан илыме верым пуымо, ты чот гыч 223 еҥлан – угыч чоҥымо шуко пачеран кандаш пӧртыштӧ. Тидлан 573,6 миллион теҥгем кучылтмо.
2024 ийыште Марий Элыште 23 ийым темыше тулык йочалан социально полшымо ешартыш мерым – чыла шотыштат йӧнан илыме верым собственностьыш налаш але ипотекым тичмашнек шӧраш выплатым – илышыш пуртымо.
Республикыште самырык еш-влакланат полшат. Ӱмаште тӱнен илыше 41 мужырлан илыме веран лияш социальный выплатым тӱлымӧ. Ты чот гыч 15 мужыр оксам шке пӧртым чоҥаш кучылтын, 26 мужыр пачерым налын. Финансированийын кугытшо 78,5 миллион теҥге лийын.
Эшеат шуко еш илыме веран лийже манын, Марий Элын правительствыштыже тиде йодыш дене системный паша умбакыже шукталтеш. Ты шотышто тулык йоча, самырык еш, инвалид, ветеран да льготан тӱшкаш пурышо моло граждан-влак икымше верыште улыт.
Марий Элым вуйлатышын пресс-службыжын уверже негызеш Маргарита ИВАНОВА ямдылен
