Пӱрымашым Озаҥыште вашлийыныт
Кужэҥер район Салтакъял селаште илыше Ельмихеевмыт нерген вич ий ончыч возенна ыле. Тиде жапыште ешыштышт шуко вашталтыш лийын.
Нунын деке мийымына годым суртоза ден озавате верандым чоҥаш материалым ямдылат ыле. Алевтина Геннадьевна ден Александр Юрьевич мемнам шукертак палыме да вучымо уна семын вашлийыч. Вич ий жапыште озанлык ятырлан кугемын, леваш ден икмыняр вӱтам нӧлтеныт. Вольык чотат ешаралтын. Шекланышна, пӧрт фронтонышто вараксим-влак пыжашым оптеныт. Тугеже, суртышто пиал лиеш.
Александр тиде селаштак шочын гын, Алевтина пошкудо Шӱдымарий ял гыч.
– Ме Казаньыште палыме лийынна. Ачамын изаже пырля пашам ышташ ӱжын. Мый чоҥалтше пӧртлаште пырдыжым шпаклеватлаш тӱҥалынам. Александр тунам пырдыжым гипсокартон дене комыжлен. Вот тыге пӱрымаш мемнам ушен, – каласыш озавате.
Алевтина Геннадьевна кызыт мӧҥгыштӧ шинча, йоча-влакым онча, озанлыкым куча. Ельмихеевмытын вич икшывышт уло. Кугуракышт, Лиана, шукерте огыл эргым ыштен.
Пӧртыштым вате-марий 2009 ийыште чоҥаш тӱҥалыныт. А илашыже 2018 ийыште пуреныт.
– Эртыше жапыш пӧртылаш лиеш ыле гын, ме суртым садак тунамак чоҥаш тӱҥалына ыле, молан манаш гын илаш нигушто лийын. Мый изинек шке пӧртыштӧ илаш шоненам. Шочмо суртна воктенак, корно гоч веле. Кызыт тушто шольым ила. Ача-авана, изана ты тӱня гыч каеныт, шольым дене икте-весылан эҥертен, полшен илена, – мане Александр Юрьевич.
Суртоза пӧрт кӧргыштӧ чыла шке кидше дене ыштен. Кӱвар шокшырак лийже манын, подвал могырым пеноплексым келыштарен. Тыге кӱварым шкешотан когыльо гай «кӱэштын ыштыме» манашат лиеш. Тушко линолеумым, дюймовко манме оҥам, ориентированно-стружечный (вес семын отат каласе) плитам шарыме. Отделкымат шке ыштеныт, лачак натяжной туврашым специалист-влак шупшыныт. Пӧртым тӱжвачын силикат кермыч дене оптеныт, кӧргӧ гыч 100 миллиметран пеноплекс да керамзит блок дене шокшемденыт. Суртым комбинированный котёл полшымо дене ырыктат. Тудо пу денат, шӱй денат пашам ышта. Теле мучко олташ ситыже манын, кум лесовоз кузов пум налыт.
– Кеҥежым, вахте гыч пӧртылмеке, мӧҥгыштӧ погынышо сурт сомылкалан пижам. Поснак шудым шуко ямдылыман. Йӧра кеч солаш верже шуко кушто уло.
Москваште ме СИП-панель гыч пӧртым чоҥена. Эргымат кеҥежым чоҥымаште тырша. Ыштен налме оксаж дене мотоциклым налын. Техникыжым шке мушкеш, ӱйла. Ончыкыжым автомашинам налаш шона. Кызытеш чаренам, молан манаш гын эргымлан 15 ий гына, а правам 18 ияшлан веле пуат. Жап шуэш, нимолан вашкаш, – мане суртоза.
Ельмихеевмыт тыгак кайыквусым, вольыкым ашнат. Вӱташте ушкал, презе, икмыняр шорык шогат, чыват уло. Кеҥежым 20 утла комбым, ятыр лудым, кок сӧснаигым налыт. Икманаш, паша сита.
Михаил СКОБЕЛЕВ,
Лидия ШАБДАРОВА.
Михаил Скобелевын фотожо.
