ЛӰМГЕЧЕ

«Пӱрымаш мундырам рончем»

Кодшо шуматкечын, 27 майыште, Советский поселкысо тӱвыра пӧртыш еҥ-влак, товатат, эҥерла «йогышт». Очыни, вес семынже лийынат кертын огыл, вет тиде кечын тыште «Кугезе кумыл» фольклор ансамбльын вуйлатышыже Галина Щербакован усталык касше эртаралте. Тудо «Пӱрымаш мундырам рончем» маналтын да 75 ийым темымыжлан пӧлеклалтын ыле.

Тиде коллективым Галина Александровна 20 утла ий ончычак чумырен да тӱҥалме пашажым але мартеат мастарын шуя. Тыршен ыштымыжын лектышыжат раш коеш: кызыт ты ансамбльым палыдыме еҥже укеат дыр. Ансамбль Советский поселкышто да районыштышт веле огыл, пӱтынь республикыште, эсогыл вес кундемлаштат чапланен! Могай гына конкурсышто, фестивальыште, мероприятийыште тудо палемдалтын огыл?!

Пайрем озам саламлаш толшо-влак, а тиде поселко, район, верысе тӱвыра отдел вуйлатыше, ансамбльжын участникше, лишыл еҥже, ӱдыр-веҥыже (эрге-шешкыже, уныкаже ты кечын толын кертын огытыл. Нуно йӧратыме аваштым-коваштым эрлашыжым Галина Александровнан шке родо-тукымжылан мӧҥгыштыжӧ посна эртарыме пайремыштыже саламленыт – авт.) пашам пырля ыштышыже, йолташыже, палымыже да шуко-шуко молат, чыла тидын нергенак палемден, кугу да моткочак кӱлешан пашам шуктен шогымыжлан тауштен ойлышт, ятыр Чап грамотым да пӧлекым кучыктышт. А пеледыш аршашыже мыняр ыле?!

«Саскавий» марий ӱдырамаш ушем лӱм дене тиде чолга ӱдырамашым саламлаш вуйлатыше Людмила Кошкина, вуйверын еҥже-влак Галина Ширяева, Маргарита Тойшева, ушемын еҥже-влак Светлана Яндукова, Раисия Николаева (Мардан Рая) миеныт да тӱрлӧ пӧлекым кучыктеныт: пеледышым, капшым веле огыл, чонжымат ырыкташ чевер-мотор кугу шовычым вачышкыже пыштеныт, Таумутым кучыктеныт. Уста сылнымут мастар Мардан Рая, мутат уке, почеламутшым лудын пуыш, а Светлана Яндукова  мурым пӧлеклыш. Такшым пайрем озалан каналтен да куанен ончен шинчашыже шола велне ӱстелым да пӱкеным лӱмынак шындыме ыле, но шукыштын саламлымышт годым Галина Александровна кынел шогалде ыш чыте. Мемнан годымат тыгак ыштыш. Йошкар-Ола гыч толшо «Марий мланде» фольклор ансамбльын сценыш лекмекыже гын тудо нунын дене пырля эсогыл муралтыш да чӱчкалтыш!

Чынжымак, чон йывыртыме годым ласкан шинчен чытет мо?! А тиде кечын пайрем озан нӧлталтше кумылан улмыжым чыланат ужна, вет уло касше мучко чурийже шыргыжмаш дене волгалте! Да кузе от куане?! Тынар шуко коллектив, каныш кечым, южышт тора корным ончыде, пайремышкыже лӱмынак толын ыле! Тиде Звенигово район Какшамарий гыч «Марий шӱшпык», У Торъял район Шӱвылак гыч «Мӧр алан», Медведево поселко гыч «Эр ӱжара», Йошкар-Ола гыч «Ший полан»,  Советский район Шнаран гыч «Пеледыш аршаш» ансамбль-влак, «Келшымаш кӱвар» эстраде группо да эше шуко моло коллектив сай йолташышт деке унала толыныт ыле да сылне номерыштым тудлан пӧлеклышт.

Иктешлыме семын каласаш гын, усталык кас моткочак тыматлын, поро кумыл дене да тыгодымак веселан эртыш.

Пайрем программе экраныште Галина Александровнан илыш корныж  нерген видеофильмым ончыктымо гыч тӱҥале. Но тыгай чулым да чолга еҥын илышыж нерген пел шагат наре шуйнышо видеошто, тынар кӱчык жапыште чыла каласкален шуктет мо?! Кузе шкеже ойла, тудын илышыж нерген книгам возаш лиеш! Кӧ пала, ала иктаж-кунам возашат тӱҥалеш.

А кызытеш шочмо кечыже, йыргешке лӱмгечыж дене саламлен тыланыме шуэш: але марте мо лийын, а илыш тудым южгунамже чотак терген, ойгымат шагал огыл колтен. Чыла тидым ӱштыл от кудалте, от мондо. Но умбакыже, Галина Александровна, илышда тек волгыдо, куандарыше да пиалан гына лиеш! Тек илыш книгаштыда кумылым нӧлтышӧ тат, кече, арня, тылзе, идалык-влак гына лийыт! Ончыкыжымат тыгаяк поро кумылан, весела, кумылзак, чулым, чолга айдеме лийын кодса. Марий калыкын йӱлажым да тӱвыражым аралымаште чарныде тыршашда Юмо тыланда тек пеҥгыде тазалыкым, кугу вий-куатым пуэн шога!

 

Любовь Камалетдинова

Авторын фотожо

Опубликовать в Одноклассники

Добавить комментарий