ЕШ ДА ИКШЫВЕ КУЛЬТУР ДА ИСКУССТВО

Пӱртӱсыштӧ лияш – эн сай каныш

Россий Президент Владимир Путинын увертарымыж почеш, 2024 ий – Еш идалык.

Тидлан пӧлеклалтше мероприятийым республикыштына шуко эртарат.

Йолташ-влак, те ача-авада,  икшывыда-влак дене иктаж мероприятийыш,  конкурсыш але акцийыш ушненда? Каныш кечылам але, паша деч вара ярсымеке, яра жапым еш дене кузе эртареда?

Ольга ФЕДОТОВА, Марий самырык театрын артистше, Самырык-влаклан Олык Ипай лӱмеш премийын лауреатше:

– Пелашем дене коктынат театрыште пашам ыштена, сандене каныш кечыште икшыве-влак дене жапым пайдалын эртарашат огына ярсе. Кызыт кас еда манме гай кудывечысе курыкышто мунчалтена, икте-весе дене мутланена, каҥашена. Икмыняр кече ончыч лум лийме деч вара курыкшымат ме, ача-ава-влак, икшывына-шамыч дене пырля ыштенна, пӧрт ончылнат лумым тӱшкан эрыктенна.

Лум шулен пытымеке, мланде кошкымеке, пушеҥгылаште лышташнер лекме годым йоча-влак дене пӱртӱсыш лектына. Тидыже шкешотан йӱлашкынат савырнен. Вӱд воктене мече дене модаш, пелен налме кочкышым тамлаш, чон почын мутланаш путырак сай.

Йоча пагытыште еш дене каныш кечылам але яра жапым эртарыме поснак ушешем лакемалт кодын: авам да акам дене пырля емыж-саскам, поҥгым ӱчашен-ӱчашен погенна.

Мӧҥгӧ деч торашке шудо солаш коштмо чоным ырыкта. Эрдене-эрак эше лупсан годым солаш йӧратенна. Кечывал лишан авам тыге ойла ыле: «Ӱдырем-шамыч, толза, мераҥ киндым конден!» Изишак нӧртымӧ киндеш шинчалым шавалта ыле, а тудыжо пушкыдо-пушкыдо лиеш ыле.

Кӱтӱм кӱтымӧ годым юалгырак игечыште ачамын тулотым ыштымыжлан моткоч йывыртенна. Авам кечываллан тамле кочкышым конда ыле, а олыкышто шӱржат, чайжат моткоч тутло лийыныт!

Мария САРАКЕЕВА, Курыкмарий районысо Йоласал школышто англичан йылмым туныктышо:

– Паша деч вара изиш каналтымеке, эрласе кечылан ямдылалтына: тунемшем-влакын тетрадьыштым тергем, икшывем дене урокым ыштена, книгам лудына… Каныш кечылаште уремыште модына, ече дене коштына, южгунам Курыкмарий театрын спектакльжым ончаш коштына.

Ксения ГРИГОРЬЕВА, самырык ава (Звенигово район):

– Кызыт мый ныл тылзаш кок изи падырашем дене канышыште улам. Садлан тӱрлӧ мероприятийыш миен толаш огына ярсе. Туге гынат, яндар южым шӱлалташ, мотор пӱртӱсым ончалаш уремыш лекташак тыршена.

Икшывем-влак кушкын шумеке, тӱрлӧ конкурсыш але фестивальыш ушнаш шонена.

А.БАЙКОВА

Фотом еш альбом гыч налме

 

 

 

 

 

 

 

 

Опубликовать в Одноклассники

Добавить комментарий