Пӱртӱсыштӧ вашлиялтше оҥай сӱрет-влак дене тӱр гоч палдарыше паша-влакым кызыт Т.Евсеев лӱмеш национальный тоштерыште «Нити природы» ончерыште ужаш лиеш.
Тудын авторжо – лӱмлӧ ученый ботаник да тӱрызӧ Татьяна Аркадьевна Полянская. А йырым-йыр ужмо моторлыкым тӱрыш кусараш тудым 36 ий шуктен толмо йӧратыме пашаже кумылаҥда. Лач тынар ий ӱдырамаш «Марий чодра» национальный паркын шанче пӧлкаштыже ышта. Тиде жапыште 120 наре шанче пашам возен, диссертацийым арален да биологий науко доктор лийын. Тачысе кечылан Татьяна Полянская парк кумдыкышто шуэн вашлиялтше кушкыл-влакым шымла. Шукыштым эсогыл Российын Йошкар книгашкыже пуртымо.
Татьяна Аркадьевнан вес усталыкше – тиде тӱрлымӧ паша. Ош канваш ырес дене мотор пӱртӱс сӱрет-влакым тӱрла: пейзажым, тӱрлӧ янлыкым, пеледышан натюрмортым. Схемыжым лӱмлӧ сӱретче-влакын пашашт негызеш шкежак ышта, лачшымак марий пӱртӱслан келыштара. Пашалаштыже тӱрлӧ тӱсан шӱртым кучылтеш. Южо иктыштыже Элнет эҥерын йогынжымат, Глухое ерымат, «Марий чодра» паркын йолын коштмо маршрутлажымат, аралыме пӱртӱс кумдыкышто илыше янлык-влакымат ужаш лиеш. Мутат уке, кажне пашажлан тудын жапшат шагал огыл кая.
Светлана Носова
Снимкыште. Т.Полянская
М.СКобелевын фотожо.
