Марий рӱдоласе Ленин лӱмеш площадьыште У ий кожым шогалтеныт.
Тудо тӱрлӧ сынан тул дене пеш сылнын чӱчкен шога. Поснак кастене шушаш пайрем кумыл шижалтеш. Кож йыр тӱрлӧ аттракционым, шатёрым вераҥдыме. Тыштак коньки дене мунчалташ ий кумдыкым келыштарышаш улыт. Икманаш, Марий Элын тӱҥ кожшо пайремлан ямде манашат лиеш. 15 декабрьыште тыште У ийым вашлийме тӱҥалтыш мероприятий эртышаш. Ты кечынак Йошкар-Олаште Йӱштӧ Кугыза-влакын тӱшкан ошкылмашышт лиеш.
А теве кугыжанышнан рӱдолаштыже тӱҥ пайрем кожым Моско область Можайск оласе округысо Знаменка ял воктене верештыныт. Тудо пайрем кожын стандартшылан келшен толын. Тудым Дровинский участковый лесничествын лесничийже муын. Тидлан чодыра пашаеҥлан Niva Chevrolet автомашина деч сравочым кучыктеныт. ТИдын нерген РИА Новости увертарен. Кожлан – 90 ий, кукшытшӧ – 25 метр, укшын кужытшо – 8 метр. Жап шумеке, тудым Моско Кремль дворецыш шогалтат.
Моско зоопаркыште вераҥдыме элнан тӱҥ экологичный У ий кожшым «Экоёлка» всероссийский акцийыш ушнышо-влакын кидпашашт дене сӧрастареныт. Тушко пластик гыч ыштыме 6 тӱжем наре модышым колтеныт. Росприроднадзор вуйлатыше Светлана Родинован палемдымыж почеш, модыш-влак коклаште поснак Российыште илыше калык-влакын тӱрлӧ курчакышт куандарат.
Светлана Носова
Снимкыште: Марий рӱдӧласе тӱҥ У ий кож пайремлан ямде.
Авторын фотожо
