Пӧртынат шке «чурийже» уло
Шернур район Чашкаял ял икмыняр уреман. Моло оралте деч ойыртемалтше суртым манын, уремла мучко ятыр жап кошташ логале. Пиалешна, кевытыш мийыше-влак мыланна Актаевмыт деке миен толаш темлышт. «Тудо тале кидмастар», — маньыч. Тыге корнынам тушко такыртышна.
Михаил Павлович Актаевын кидше кеч-могай пашалан толеш. Тудо инженер-электрик, Шернур райпошто ышта, йӱкшыктарыше оборудованийым ачала. Пӧръеҥ деке Шернур район гыч веле огыл,вес районла гычат холодильникым олмыкташ кондат.
Актаевмытын суртышт Чашкаялыште молын деч ойыртемалтеш. Поснак — окналаж дене. Кажне тӧрзам мотор окнасерга сылнештара. Тыгак суртын сынжат вестӱрлырак, тыгай тӱсан суртшо ты ялыште шуэн вашлиялтеш. Икманаш,пӧртын шке «чурийже» уло манаш лиеш. Мо оҥайже, Актаевмытын капка меҥгын пырняжым ожнысо семын кӱ ӱмбаке шынденыт. Меҥгыжым сайдинг дене сылнештарен комыжленыт. Тӱрлӧ чия дене чиялтеныт. Тыгак сурт-оралтым тӱзатымаште профнастилым шуко кучылтыныт.
— Профнастил — чапле материал,тудын дене чылажымат писын ышташ лиеш, кужу жаплан чыта. Садлан печыланат, тиде материалым кучылтымо, — мане озавате.
Сурт йыр сад-пакча верланен. Оза-влак ятыр олмапум,тӱрлӧ вондерым шынденыт,пакчаштат изи огыл.
— Тиде суртыш 1994 ийыште марлан толынам. Пӧртым пелашемын ачаже 1987 ийыште нӧлтен. Кызыт ме тыгыде вольыкым,тыгак комбым,лудым,мулард урлык лудым ончена. Мулард тыгай лудо деч кугурак. Мыланем тыгай лудым ончаш пеш келша. Ончыч мӱкшым онченна, кумло утла мӱкш омарта лийын, ӱмаште ала-могай амаллан кӧра пытен. Черланеныт, очыни. Умбакыже мӱкшым ашнаш тӱҥалына ала уке, жап ончыкта, — мане озавате Валентина Валерьевна.
Михаил СКОБЕЛЕВ,
Лидия ШАБДАРОВА.
Михаил Скобелевын фотожо.
