4 ноябрь пайремлан поян ыле. Ты кечын чумыр Россий мучко Калыкнан икоян улмо кечыжым пайремленыт, Марий Элнан шочмо кечыже лачак келшен толын, православий тӱня Юмынаван Казанский юмоҥажын кечыжым палемден. Ты кечынак Марий Элын калык писательже, драматург, артист, мер-политик илышын чолга еҥже, 1991–1996 ийлаште Марий Эл Республикын Кугыжаныш секретарьжылан ыштыше Николай Федорович Рыбаковын шочмо кечыже лийын. Тудын лӱмешыже ты кечын Волжский район Пӧртанур ялыште шогалтыме чапкӱм торжественно почыныт.
Погынышо калыкым саламлымыж годым Волжский муниципал районым вуйлатыше В.И.Сергеев тыгай ойым каласен:
– Тиде мемнан Юлсер кундемлан веле огыл, чыла республиклан, марий калыклан пеш кугу событий. Ме шкенан лӱмлӧ землякнам мондышаш огынал. Чапкӱ, марий калык коклаште тыгай кӱкшытыш шушо айдеме-влак улыт манын, шарныкташ тӱҥалеш. Утларакшым самырык тукымлан каласыман: шкенан виян талешкына-влакым ынышт мондо да нунын семын ончыко пеҥгыдын ошкылышт, марий калыкнам чапландарышт. Тӱҥ паша тидлан кӧра ышталтын.
Саламлыме мутым тыгак Помар ял шотан илем администраций вуйлатыше Н.В.Вершинин ойлен да чапкӱм ышымаште тыршымыштлан районысо депутат-влак погынымашын таумутшым Виктор Кокшагинлан, Валерий Осиповлан, Иван Шишкинлан кучыктен.
Изи ер гыч кугу эҥер лиеш, вара теҥызыш савырна манме тошто ой семынак чапкӱм тӱшка вий дене нӧлтен шогалтыме. Тиде паша марий меръеҥ-влакын тыршымыштлан кӧрат шукталтын. Организатор-влакын ойлымышт почеш, кид-вий полышат, окса надырат – кӧ 500, кӧ 1000 теҥгем пуэн – шижалтын. Тиде кечын А.Данилов, Е.Сергеев, Л.Шишкина, ял старосто Н.Ефимов, А.Захаров, А.Ефимов, Г.Осипова, Л.Иванова А.Григорьев, М.Соловьев чапкагаз дене палемдалтыныт. Нунылан поэтессе Альбертина Иванова писательын 3 томан ойпого книгаже-влакым пӧлеклен. Тудат шокшо мут дене шарналтен.
Эн кугу да шергакан унаже Н.Рыбаковын Юрий эргыже да Марина ӱдыржӧ, нунын шочшышт да уныкашт-влак лийыныт. Нуно аваштын да шкеныштын лӱмышт дене моткоч кугу таум каласеныт.
Айдеме тунар курым ила, кунар тудым айдеме тукым шарна. Н.Ф.Рыбаков нерген моткоч поро, таум каласыме мут-влак шуко йоҥгеныт, чапкӱ ӱмбач ош леведышым налын кудалтымек, воктекше пеледышым пышташ кумылан-шамыч моткоч шуко лийыныт. Кастене ялысе клубышто пайрем кас годымат марий калыкын тале эргыжым моктен чапландареныт. Чыла шарнымаш-влак, илен-толын, книгаште савыкталтыт манын шонена.
Ала ӱшаныман, ала уке… Кенета ял куп велым ныл ош йӱксӧ кавашке нӧлталтын да, кок йыр савырнымек, умбаке чоҥештен каен. Мо тиде? Очыни, ару чонан, яндар уш-акылан Миклай – Николай Федорович Рыбаков – шочмо калыкше дене тыге саламлалтын чеверласен.
Л.СЕМЕНОВА
Ж.СОЛОВЦОВЫН фотожо
Материалым ямдылымаште фото да видео дене полшымыжлан селькорна Жорж СОЛОВЦОВЛАН кугу таум ойлена.
