31 июльышто Марий Элым вуйлатыше Юрий Зайцевын «Таза республик» проектшым илышыш пуртымо кышкарыште Йошкар-Оласе кӱртньыгорно вокзал кундемыште Тазалык пункт пашам ыштен.
Йӱр йӱрын гынат, оласе калык, пунктышто толын, диспансеризацийын икымше йыжыҥжым эртен: вӱрысӧ глюкозо ден холестеринын чотыштым, вӱргорно да шинча кӧргысӧ давленийым висыктен, капкыл кӱкшыт ден нелытым, капкыл нелытын индексшым, шодын кугытшым рашемден да терапевт дене мутланен.
Калыклан кӱлешан проектын координаторжо-влак Игорь Петухов ден Андрей Болдянкин оласе калыкын илышыжым саемдымашке виктаралтше мероприятийлаште чолган участвоватлат.
– Диспансеризацийын кышкарыштыже профилактике шотан медосмотрым да врач-специалистын консультацийжым кажне еҥ яра эртен кертеш. Тыгай йӧн дене пайдаланыде ида код! – манеш А.Болдянкин. – Проектын тӱҥ шонымашыже калыклан медицине полышым илыме пӧрт воктенак пуымо дене кылдалтын. А тылеч кумдарак услугылан, мутат уке, поликлиникыш кайыман.
Тиде кечын медик-влак волонтёр-шамычын полшымышт дене ныл шагат жапыште 100 утла пациентлан эмлалтме йӧным темлыме да консультаций шотан полышым пуэныт.
– Рӱдоласе калык Тазалык пунктын пайдалыкшым шукертак умылен да тудын дене кумылын пайдаланаш тӱҥалын. 23 июльышто «Космосыш» фонтан воктенысе Юбилейный площадьышкат шуко еҥ толын да диспансеризацийын икымше йыжыҥжым эртен. Пациент-влакын Марий Элым вуйлатыше Юрий Зайцевлан «Таза республик» проектым илышыш пуртымыжлан тауштымышт куандара. Чынжымак, калыклан тазалыкым эскераш пеш сай йӧн ышталтын, – палемда мер пашаеҥ Игорь Петухов.
Проектын мероприятийже-влак нерген Тазалык аралтыш министерствын официальный лаштыклаштыже да социальный кыллаште пален налаш лиеш.
М.ИВАНОВА
«Марий Эл» увер агентствын фотожо
