Йошкар-Оласе Марий тӱр рӱдер шушаш 2024 ийым Марий пӧръеҥ вургемым аралыме идалык семын эртараш палемден.
У ий деч ончыч Марий Элын калык мастарже Ираида Степанован вуйлатыме рӱдерыште идалыкысе пашам иктешленыт. Чолга ӱдырамаш шке йырже Йошкар-Олаште да республикын тӱрлӧ лукыштыжо илыше кидмастар-влакым ушен. Нунылан, тыгак кумылан-шамычлан мастар-класс-влакым эртара, тӱрлаш, марий тувыр-шовырым, тӱрлӧ сӧрастарышым ышташ туныкта. А кодшо идалыкшым рӱдер марий ӱдырамаш сӧрастарышлан пӧлеклен ыле. Лектышыжым декабрь тӱҥалтыште эртыше этнофорумышто аклен кертме. Элнан ятыр кундемже гыч кидмастар-влак тидлан идалык наре ямдылалтыныт, шке ыштыш-кучыштым, я тошто вургем ден сӧрастарышым уэмден конденыт. Вес ийлан увертарыме идалыкшымат тыгаяк этнофорумышто иктешлаш шонат. Санденак тушко пӧръеҥ тувыр, мыжер, ӱштӧ да моло сӧрастарыш дене вучат.
С.Носова
Фотом кидмастар А.Ивановын еш альбомжо гыч налме.
