«МаксСтрой» чоҥышо компаний
Пӧрден ыштат, нӧлтен шындат
Пырням пӧрден ыштыме сӧрал пӧртым ужын, кажнын кумылжо нӧлталтеш, векат. Но тидлан эн ончыч проектым ямдылат, вара тудын почеш пырням пӧрден пӱчкедат да тунам гына кӱлмӧ верыште чаткан нӧлтен шындат. Шукыж годым чыла тидым ик компанияк шукта. Юлсер кундемыште гын – «МаксСтрой» ИП Максимои Э.А.
Тудын тӱҥ производствыжо Сотнур селаште верланен. Цех ончылно пеш шуко пырням орален оптымо шинчалан перныш, а цех шеҥгелне – пӧрден да пӱчкеден лукмо ямде продукций. А кузе тудо ышталтеш – тидым цех кӧргыштӧ гына ужаш лиеш. Чодыра гыч кондымо козыра пырня пӧрдем станок гоч тугай йыргешке да яндар лийын лектеш. Вара тудым ӱмбала опташ ик велымже кутышеш волаклат, а торешла опташ кок мучаште лодемлат. Ямде пырнялаже кужуат да кӱчыкат лийыт, шуяшат да ушемланат келыштаралтыт. Да чыла тиде вискален ышталтеш. Цех мастер Тамара Васильева чын ыштымым тергенак коштеш. А станочник Виталий Петров ден торцовщик Станислав Петров – ача ден эрге – мастар улыт, чыла келыштарат. Теве кузе пӧрт пурат тӱрлӧ станок полшымо дене чаткан ямдылалтеш.
Компаний вуйлатыше Эдуард Александрович Максимов дене шым ий ончычсылак цех воктенысе тошто конторышто вашлийна. Тудо тунам проект почеш мом ыштышашым ончен шинча ыле. «Тушто кажне пырняже, кажне пӱчкыш ден ушемже ончыкталтыныт. Шке ямдылем гын, палем», – манын ыле. Тидын нерген мут лекмеке, «МаксСтрой» чоҥышо компанийын генеральный директоржо тыге каласыш:
– Чылажат 1997 ий гыч тӱҥалын. Тунам мый пурам кид дене руымо, а ныл ий гыч пӧрден ыштыме пашашке ушнышым. Шкемын тыгай цехым тыште 17 ий ончыч почым. Тылеч вара мыняр шуко проектым ямдылаш логалын! Вет тидым ончыч чыла шке ыштенам. Тунам офисемжат ты конторыштак ыле. Ынде – Казаньыште. Тушко калык шукырак толеш, да йӧнжат утларак. Сандене идалык утла туштак илем. Ынде командынат изи огыл. Офисыште проект, смете, ужалымаш отдел-влак да кажныштыже посна специалист-влак улыт. Проектым шке ом ыште гынат, тергем. Адакше тудым заказчиклан ынде экраныште ончыктена. Пӧртышт эше уке, а нуно тудым тӱжвачын да кӧргӧ гыч чоҥен шуктымо гайымак ужыт. Иктаж-мо ок келше гын, вашталтышым пуртыктен кертыт. Тыгай йӧным пуымына калыклан келша.
– Заказшым лишыл кундемыште але ӧрдыжтат ыштат? – рашемдаш кӱлешлан шотлышым.
– Пандемий деч ончыч Турций гычат икмыняр заказ ыле, но чер шарлыме да чек петырныме амал дене нине договорым шӧраш логале. Сандене кызыт Россий кӧргыштак гына ыштена. Ондак Йӱдвел кундемышкат коштмо, Крымыштат чоҥымо. Ынде тораш огына кошт – Москва кундемыште, Ульяновск велне, Самарыште, Татарстаныште, Башкортостаныште, Чувашийыште да Марий Элыште оралтылам нӧлтена. Паша тыштат сита, – вашештыш Эдуард Александрович.
Моланже раш, вет кызыт тӱҥалтыш гыч мучаш марте чыла шканышт ышташ логалеш. Заказчик-влак пӧртым нӧлтен тӱзатыктыме дене гана ынешт серлаге, канализацийым келыштарыме, шокшым пуымо, электросетьым шупшмо пашамат шукташ йодыт. Сандене чыла сомыл денат специалистышт улыт. Да чылаланат мутым кучашышт перна. Подрядчик велым вич ийлан гарантий пуалтеш. Шке экшыкыштым яра тӧрлат, а весыным – ешарен тӱлымылан, мане вуйлатышышт.
Кызыт нуно пӧрдымӧ веле огыл, кид дене руэн ыштыме пырня денат, профилироватлыме да клеитлыме брус денат, эсогыл кермыч дене оралтылам чоҥат. Еҥ-влак мо дене шонат, тудын дене ыштыктен кертыт. Адакше компаний пӧртым чоҥаш ипотеке программым темлыше чыла банк дене кылым кучышо семын аккредитоватлалтын. Сандене заказчик-влак, кредитым налнешт гын, ты йодыш денат тудлан эҥертен сеҥат. Компаний тыгак Шкем шке виктарыше организаций (СРО) радамыш пурен. Тидыже тудын профессионализмжым, чоҥымаште качествын кӱкшӧ стандартшылан келшен толмыжым да шке пашажлан мутым кучымыжым ончыкта.
– Социальный объектламат, мер оралтылам, чоҥена. Татарстаныште мемнам сайын палат гын, шкештак тыгай йодмаш дене лектыныт. Ме кызыт «Ярдам – Полыш» поро кумыл мусульман фондлан оралтылам чоҥымо презентацийым ямдылена. Пошкудо республикыште медресе манме духовный школ уло. Тудо общеобразовательный школ ден мусульман духовный семинарий сомылым иктеш шуктен толеш. Кызытсе марте эрге-шамычлан кок тыгай школ лийын. Ынде ӱдыр-шамычлан посна почнешт. 14-15 майыште Казаньыште «Россий – Ислам тӱня» XV Тӱнямбал экономике форум лиеш. Тушко уло мусульман тӱня чумырга – тӱрлӧ эл гыч толыт. Ме тушто ӱдыр-влаклан медресем ыштыме проект дене палдарышаш улына, сандене кызыт пеш ямдылалтына. Тиде комплекс тунемме да юмылтымо верлам, йоча-влак илыме тӱшкагудым да ача-ава-влаклан унагудым ушен шогаш тӱҥалеш. Вара шкежак тудым чоҥаш тӱҥалына, – каласыш чоҥышо компанийым вуйлатыше Эдуард Максимов.
Мутат уке, кугу пашам тудо шке ӱмбакыже налын. Но калыкын ӱшанже деч посна огыл. А тиде ӱшанжым шке профессионализмже, чылажымат шот дене шуктымыжо да пашам йӧратымыж дене сулен. Да тидлан весат полша: тудын вуйлатыме компаний – еш компаний. Эше шым ий ончыч икымше гана вашлиймына годым Эдуард Александрович ойлен ыле: производствылан шкеже вуйын шога гын, документ ден договор пашалан пелашыже Альфия Каримовна мутым куча. Ынде шочшыштат тушкак ушненыт. Эргыже Роман, Россий правосудий кугыжаныш академийын Казаньысе филиалжым тунем пытарен, кеч-могай силовой структурыш пурен кертеш ыле, но тудо ачажын тӱҥалме пашам ойырен налын. Кызыт тыште алмаштышын сомылжым шукта, уым кычалмылан да компанийым вияҥдымылан вуйын шога. Ачаже тудлан ончыкыжо вуйлатыме пашам пуаш шона. Ӱдыржӧ Лада Казаньысе архитектурно-строительный университет деч вара смете паша дене ешартыш шинчымашым налын да ты сомылым шукта. Манмыла, уло ешге «МаксСтрой» компанийын пашажым виктарен шогат. Санденак тӱшкан ыштымышт ушнен толеш. Тидыже Ешын идалыкыштыже еш дене ыштымын пайдалыкшым раш почын ончыкта.
Мемнан еш бизнесын ик кӱлешан ойыртемже – йӱлам да чон поянлыкым тукым гыч тукымыш пуэн толмаш.
Тидыже компаний кӧргыштӧ ойыртемалтше шӱлышым шочыкта да Тендан пӧртда йӧратымаш да чон тыршымаш дене чоҥалтмылан ӱшаным ешара.
«МаксСтрой» компаний
Ме Тендан шонымо гай пӧртым але мончам пырня але кермыч дене чоҥаш полшена!
Мемнан проектна дене тыште: https://skmax.ru да https://skmax-kazan.ru – палыме лийын кертыда.
Мемнан пашаеҥна-влак Тыланда +7 (843) 211-91-27 але +7 (843) 248-86-11 телефон дене ой-каҥашым пуаш ямде улыт, Те тыгак мыланна infro@skmax.ru электрон адрес дене возен колтен кертыда.
Тендам мемнан офисыш тыгай адрес дене ӱжына: Казань ола, Академик Губкин урем, 37-ше пӧрт, 11-ше офис.
Юрий ИСАКОВ
Снимкылаште: Максимовмыт еш (эрге ден ӱдыр шогат, ача ден ава шинчат); пырням пӧрдемдымаш; пӧрден ыштыме пӧрт.
Авторын да компаний деч налме фото
