Кызыт пӱтынь элна мучко «Уло еш дене» проектын конкурсшо эртаралтеш.
Тушко Марий Эл гыч ушнышо-влак кокла гыч иктыже – Кужэҥер район гыч Поликарповмыт еш.
Тыгай шонымаш кузе шочмо нерген Татьяна Михайловна тыге каласкалыш:
– «Уло еш дене» конкурс увертаралтмым эн ончычак мый ужынам да Артём эргым ден Валерия шешкымлан тушко ушнаш темленам. Нуно келшеныт. Но тӱрлӧ амаллан кӧра кокымшо заданийым ыштымашке веле ушнен шуктенна. Туге гынат вараже икымшыжымат ыштенна. Пытартыш заданийымат шуктен огынал, молан манаш гын шешкым таче-эрла азам ыштышаш – нылымше уныкам шочшаш да кызыт – эмлымверыште. Кызыт кум ӱдырышт улыт да УЗИ ындеже эрге лийшаш манын ончыктен такшым…
Поликарповмыт еш 27 январьыште регионыштына эртаралтше кокымшо розыгрышыш логалын да пӧлекым сеҥен налын!
– Тидын нерген мыйын Вконтакте лаштыкышкем уверым колтеныт ыле: «Те «Магнит» кевытыш 1000 теҥгеаш сертификатым модын налында». Тӱҥалтыште ӱшанымемла ыш чуч. Сандене Кужэҥерыште илыше эргым-шешкым деке кудальым. Нуно тунамак ты кевытыш кайышт. Чынак, тиде сертификат почеш сатум налаш лиеш улмаш. Тыге уло ешлан кочкыш йӧрварым наледенат тольыч.
Татьяна Михайловнан ойлымыж почеш, нуно «Всей семьей» конкурсыш умбакыжат ушнаш да темлыме заданий-влакым ышташ ямде улыт.
Ушештарыме семын ойлаш гын, тиде конкурсыш ушнышашлан ВКонтакте соцкылысе лаштыкыште группыштыжо регистрироватлалтман. Проектын официальный пабликшын адресше тыгай: https://vk.com/vseysemiey
10 март марте кеч-могай еш конкурсын участникше лийын кертеш. Кажне кугарнян организатор у заданийым савыкта. Тудым арня жапыште ыштыман. Тыгодым кок хештегым: #всейсемьей да #всейсемьей12 палемдаш мондыман огыл.
Любовь Камалетдинова
Фотом еш альбом гыч налме
