Т.Евсеев лӱмеш национальный тоштер 1 февральыште «Пӧлеклыме кече» акцийым эртара.
Кажне ийын эртаралтше йӱлам эртарыме кечын кумылан-влак тоштерыш ешыште аралалтше тошто арверым намиен кертыт: фотсӱрет ден портретым, фарфор ден мебельым, модышым, книга ден документым, вургемым, сӧрастарышым. Тоштерыште нуно кокымшо илышым налыт, фондым пойдарыше экспонатыш савырат. Тоштер пашаеҥ-влак нуным тӱрлӧ ончерлан кучылташ тӱҥалыт.
2025 ийым Отечествым аралыше-влакын идалыкышт семын увертарыме. Кугу Отечественный сарыште Сеҥымашлан 80 ий темеш. Санденак ты гана «Пӧлеклыме кече» акцийыш ушнышо-влак коклаште специальный военный операцийын участникше-шамычат лийыт.
Кумылан-влакым 2025 ий 1 февральыште 10 шагат гыч 18 шагат марте тошерын тӱҥ корпусыштыжо (Советский урем, 153-шо №-ан пӧрт) вучат. Лекше йодышым 8 (8362) 34-75-30, 34-75-32 телефон дене рашемдаш лиеш.
Светлана Носова
Фотом тоштерын сайтше гыч налме