Республикыштына 100 ий деч шукырак илыше еҥ-влак эше ситышын улыт. Теве тений март тӱҥалтыште гына кок ӱдырамаш 103 ияш лийын.
2 мартыште Марий Элын паша да социальный аралымаш министржын алмаштышыже Галина Ярцева Клавдия Ивановна Филипповам мӧҥгышкыжӧ саламлаш миен, Кугу Отечественный сарын ветеранжылан, тылын труженикшылан регионым вуйлатыше Юрий Зайцев деч саламлымашан открытке ден шарнымашан пӧлекым да, мутат уке, сылне пеледыш аршашым кучыктен.
Клавдия Филиппова Чуваш Республикыште шочын, вара ешышт Челябинскыш куснен, тыге ӱдырын йоча да самырык пагытше тиде олаште эртен.
Сар ийласе жапше молын гаяк неле лийын, но Клавий изинек поро да весела кумылан улмыж дене ойыртемалтын, да тиде койышыжо йӧсӧ пагытым куштылгынрак илен лекташ полшен.
Ӱдыржӧ ден эргыже шочмо деч вара Клавдия Ивановна Йошкар-Олашке куснен. Тудо ӱмыржӧ мучко бухгалтерлан тыршен, коллегыже-влак коклаште пагалыме еҥ лийын, фотографийжат Почёт оҥаште кужу жап кечен. Сулен налме канышыш «Электроавтоматика» завод гыч лектын.
Клавдия Ивановна илалше ийготыштат лишыл еҥже, родыжо да йолташыже-влак дене пеҥгыде кылым куча, а эше эр еда гимнастикым ышта, тӱнямбалне да элыштына мо ышталтмым тӱткын эскера.
103 ийым темыше вес ӱдырамаш – Любовь Макаровна Черкашина. Тудо Клавдия Ивановна деч ик кечылан варарак, 3 мартыште, шочын, ӱмыржӧ мучко гаяк кыл сферыште телеграфисткылан тыршен, техникым жаплан келшышын уэмден толмылан кӧра шуко тӱрлӧ аппарат дене пашам ыштен.
Кугу Отечественный сар тӱҥалмек, 19 ияш Люба фронтыш каяш тарванен, но военкомат тудым тушко колтен огыл – ӱдырын тазалыкше начар улмаш. Тунам Любовь Черкашина фронтлан да сеҥымашлан кертмыж семын полшаш тӱҥалын. Сар деч ончыч да, кок гана эвакуироватлымым шотлаш огыл гын, тудын тулан пагытыштыжат Ростов-на-Дону олаште пашам ыштен, моло дене пырля окопым кӱнчен. Тыныс жапыште Южно-Сахалинскыш каен, Мӱндыр Эрвелым нӧлташ полшен. 1975 ийыште Йошкар-Олашке илаш куснен.
Любовь Макаровна Марий кундемыштат йӧратыме специальностьшо дене пашам ыштен, сулен налме канышыш почто пӧлка гыч лектын. Илышыже неле лийын гынат, вуйжым нигунамат сакен огыл, шкенжым чыла вереат пашам йӧратыше, вес еҥым пагалыше поро шӱм-чонан айдеме семын ончыктен.
Тылын труженикше «За доблестный труд в Великой Отечественной войне 1941-1945гг.» да Сеҥымашын лӱмгечыжлан пӧлеклалтше медаль-влак дене палемдаллтын.
Кызыт Любовь Макаровна ӱдыржӧ дене ила. Тудымат Йошкар-Оласе калыкым социально обслуживатлыме комплексный рӱдерын пашаеҥже-влак мӧҥгышкыжӧ саламлаш миеныт, пеҥгыде тазалыкым, куатым, чолгалыкым да тыныс кавам тыланен, Марий Элым вуйлатышын саламлымашыжым, шарнымашан пӧлекым да пеледыш аршашым кучыктеныт.
Маргарита ИВАНОВА
Марий Элын Паша да социальный аралымаш министерствыжын фотожо
