Марий Эл вуйлатыше Юрий Зайцев Медведево район кундемыште орымо чер шотышто карантиным увертарен.
Келшыше кӱштымашым 20 январьыште лукмо. Лӱдыкшӧ кундемлан Пиясир (Нурма) селам шотлымо.
Медведево районысо вольык чер ваштареш кучедалме шотышто станцийыште палемдыме почеш, черан рывыж сурт озанлыкыш пурен да орымо чер деч прививкым ыштыдыме пий дене кылым кучен. Пий оза тидын нерген ветеринар-влаклан увертарен.
Селасе 57 пийлан, 33 пырыслан, 10 шорык ден казалан, 12 вуй тӱкан шолдыра вольыклан орымо чер деч прививкым ыштыме.
Вячеслав Смоленцевын фотожо.
